Nongstoiñ, Lber 6: Ka seng Hynñiewtrep Achik People Council hapoh ka jingïalam u samla Jylliew Singh Marweiñ kum u President, u la ong ba ka seng HAPC ka pynrem jur ïa ka jingleh shit khlieh ki katto katne kiba la leit ban kawang maw ne wiang ding ïa ka ophis treikam jong u bah Methodius Dkhar MLA ka Mawshynrut konstitwensi.
Ha kajuh ka por utei u samla u la ai ruh ka jingïaroh ïa ki nongkyrshan ne ki paidbah jong ka thaiñ Mawshynrut, kiba ym shym la shah ïalam bakla ha kiwei pat. Ka jingleh jong kitei ki MLA jong ka thaiñ kiba na ka seng HSPDP kam dei kaba ki mih seng, hynrei ki ai jingkyrshan ban thaw ïa ka sorkar kaba dei ka hok jong ki ban leh ïa kata haba ki paidbah u la ai bor ban long u nongmihkhmat jong ka thaiñ.
U la ther ruh halor ka jingkwah myntri rangbah jong kiba bun da kaba ong, “Kumno yn dawa myntri rangbah da u Khasi haba wat ïa u ba don ruh ngi dang kynthoh sniew kum ïa u bah Prestone Tynsong, u ba lah dei uwei na ki riew shymphang bad u ba lah jop don burom bun bun sien”.
Ula ong ruh, “Ha ka jingshisha lah dei ban sngewthuh kaei ka jingmut kaba ngi ong ka democracy. Kumno yn shu dawa ne kwah myntri rangbah jubor da u Khasi haba katba dang don hapoh ka shatri Meghalaya. Lda ka long kumta kan wanrah pynban ïa ka jingïasngewpher jaidbynriew”, ong utei u samla ha ka jingïakren bad u nongthoh khubor mynta ka sngi ha ka ophis treikam jong ka seng HAPC Nongstoiñ.
