Khang tala ki paidbah ïa ki ar tylli ki skul ha shnong Mawthawpdah

0

Mawkyrwat, Lber 06: Kawei ka kynhun ba kynthup naduh ki longkpa, longkmie ki samla kaba hapoh ka jingïalam jong u bah Sparlindro Lyngdoh Marshillong mynta ka sngi ka 6 tarik u Lber, 2023 ki la leit ban khang tala ïa ki ar tylli ki jaka pule kiba don ha shnong Mawthawpdah, South West Khasi Hills District.
Ki ar tylli ki jaka pule ne ki school kiba la shah khang-tala ki long ka Mawthawpdah Presbyterian Deficit Upper Primary School, Mawthawpdah bad ïa ka Mawthawpdah Government Lower Primary School (SSA) bad ka daw ba ki la leit khang-tala ïa kine ki skul ka long ba naduh mynshwa haduh mynta kim pat ïoh ka jingpynshai ba thikna halor kiba bun kiei kiei naduh ki rukom pynïaid bad rukom pynkylla ïa ka kyrteng jong ka skul kumba ka long naduh mynshwa bad khamtam eh ïa ka jingpynïeng ïa ka jingtei ba thymmai bad pynpra noh ïa kaba rim.
U bah Sparlindro Lyngdoh Marshillong haba kren ha ki lad pathai khubor hadien ba la dep khang-tala u la ong kum ki paidbah ki kwah ym ïa kano kano ka jingïasniew hynrei ki kwah beit ba kita ki bor ba dei peit bad ki nongpynïaid skul ki dei ban wan ban pynshai halor ki kynrum ki kynram ba don naduh ka Government LP School kaba la pynjot, ka Medium English School, Mawthawpdah kaba la ai kyrteng mynta ka Mawthawpdah Presbyterian (Deficit) Upper Primary School, Mawthawpdah bad kumjuh ruh halor ka madan bad lada ki lah ban wan pynshai noh kloi kum ki paidbah hapoh ka kynhun u bah Sparlindro Lyngdoh Marshillong kin long kiba la kloi ban ïa suk ïa saiñ.
“Lada kita ki bor pynïaid jong kine ki skul ryngkat ki nongpynïaid jong ka shnong ki kloi ban don ka jingïasuk bad hangta ngin sa plie ïa ka skul kumba ju long bad kane ruh ka dei tang hadien ba ka jingpynshai ba thikna ka la wan”, ong u bah Sparlindro Lyngdoh Marshillong bad lada ym pat ïoh jingpynshai kine ki jaka pule kin sa kylla long noh ki jaka theh ñiut.
Ha kaba ïa dei bad ka Mawthawpdah Presbyterian (Deficit) Upper Primary School, Mawthawpdah kaba mynta, u bah Sparlindro Lyngdoh Marshillong u la ïathuh ba naduh ba la seng ïa ka ha u snem 1960 la ai kyrteng ka Medium English School, Mawthawpdah kaba dei hapoh ka jingpynïaid jong ka shnong hynrei hadien u snem 2000 pat la pynkylla ïa ka sha ka Mawthawpdah Presbyterian (Deficit) Upper Primary School, Mawthawpdah ha kaba kane ruh ka la pynsah umdum ïa ki paidbah balei la pynkylla.
Namarkata, u la buh ruh ka jingkyrpad ïa ki bor ba dei peit na ka tnad ka pule puthi naduh u SDO, u DI bad kumjuh ruh ïa u Deputy Commissioner, South West Khasi Hills District ba ki dei ban wan pynshai halor kane ka bynta khnang ba kan nym don kano kano ka jingsah umdum ha ki paidbah bad lada kita ki bor ba dei peit kin wan pynshai, kim dei ba pynshai habar jong ka madan kaba don hapoh shnong Mawthawpdah, hynrei kin wan beit ha kane ka jaka kaba kine ki ïing skul ki ïeng, ong u bah Sparlindro.

Leave A Reply

Your email address will not be published.