Ka jingkhang Internet kan nym wanrah jingsuk ka sorkar ka dei ban shim da kiwei ki lynti

Nongpoh, Naiwieng 22: Ka Synjuk ki Rangbah Shnong, Ri Bhoi District, haka jingïalang kyrkieh bala long mynta ka sngi ha Umsning kala pynrem jur ïaka jingleh riewkhaw jong ki pulit ka Assam kiba la synreit kuli pathar ïaki paidbah haka jingjia hynne ka step phyrngap haka shnong Mukroh West Jaintia Hills.
Haba kren sha ki lad pathai khubor mynta ka sngi naka liang u Bah PB Sylliang General Secretary ka Synjuk ki Rangbah Shnong haka jingdonlang u Bah BB Makdoh Chairman bad kiwei kiwei, u la pynpaw ba kum ka Synjuk ka pynrem jur ïaka jingleh riewkhlaw jong ki pulit ka Assam kiba nud ban siat im im peit peit ïaki mynsiem ba lui lui jong ki paidbah ha katei ka shnong haduh ba 5 ngut ki mynsiem briew kila duh noh ïala ka jingim bad shibun kiwei pat kila mynsaw.
U la ong ruh ba watla ka sorkar Meghalaya bad Assam ki dang don hapdeng ka jingpynbeit pud ha kaba kila dep ruh ban soi ïaka MoU hakhmat u Amit Shah myntri kam pohiing ka ri, hynrei i kumba ka sorkar Meghalaya bad Assam kam don ka jingsngewthuh jingmut kumba la sakhi na katei ka jingjia.
U la kyntu ruh ïaki khun samla ka them Ri-Bhoi bad haka jylla baroh kawei ba kim dei ban leh khluid ha kaba ïadei bad katei ka mat kaba lah pynban ban wanrah kano kano ka jingjia ba sngewsih bad kaba ktah ïaka shongsuk shong saiñ haka jylla bad kyrpad ruh sha u DC bad SP ka Ri-Bhoi ba kin long kiba peitngor haka district khamtam ban phah pulit kham bun naki jaka sor sha ki thaiñ khappud ka jylla khamtam ka Ri-Bhoi kaba don syndah bad ka Assam ban nym mih kano kano ka huri hura ïaki paidbah.
Ha kaba ïadei bad ka jngshim rai jong ka sorkar ban khang ïaka Internet naka liang u Bah PB Sylliang u la ong ba katei kan nym wanrah satia ïaka shongsuk shongsaiñ haka jylla hynrei ka sorkar ka dei ban shim da kiwei ki lad ki lynti, khamtam ha kum kane ka por ba bun naki khynnah ki pyndonkamïaka internet ban ioh ïaki jingthoh bad ban lum jingtip naka bynta ban pynkhreh ïaki eksamin bapher bapher.
Hakajuh ka por u Bah PB Sylliang, u la ïathuh ba ha kane ka jingïalang la ïa kren ruh halor ka jingpynshai ba la ïoh na ka Khasi Hills Autonomous District Council kaba la bthah beit ïa ka Hima Mylliem ban ai NOC ïa kino kino kiba thmu sengkam sengjam kum ki hotel, wine shop bad kiwei kiwei tad ynda ïoh ïa ka NOC na ka Synjuk ki Rangbah Shnong ha kaba kum ka Synjuk kala pdiang ïa katei ka rai jong ka District Council bad na ka liang ka SKRS ka la shim ruh ïa ka rai ban pynkup burom ïa ki samla ïalehkai kiba la lah ban wanrah ïa ka nam ka burom ïa ka Ri Bhoi District lyngba ki takma ba la ioh khur na ka 2nd North East Olympic Games kaba dang shu kut shen ha nongbah Shillong kumjuh ruh ïa ka Kong Margret Pathaw kaba la ioh ban khur ïa ka takma ksiar na ka lympung ïalehkai World Arm Wrestling Championship kaba la long ha Turkey kaban sa pynlong ha ka 10 tarik u Nohprah ha Nongpoh.