Ka jingkhang ïa ka Internet ka long ban pynkbum jubor ïa u paidbah: Dr. Mukul

By Mawphor Editor On Dec 4, 2022

Opposition leader Dr Mukul Sangma speaking during the unveiling the portrait of (L) Dr Donkupar Roy at Meghalaya Legislative Assembly on Thursday. (Photo by Sanjib Bhattacharjee).

Shillong, Nohprah 03: U nongïalam ka liang pyrshah jong ka iing dorbar thaw aiñ ka jylla u Dr Mukul Sangma u la ong ba ka jingkhang internet ba khah khah ka sorkar MDA haba don kano kano ka jingïakhih ka dei beit namar kam kwah ba ki paidbah kin ïoh ban kynthoh ïa ka jingbym ler jong ka ban pynneh ïa ka suk ka saiñ ha ka jylla.
Haba kren ha ka lympung ïatai Town Hall With Dr Mukul– In Conversation with Women ba la pynlong da ka 17 North Shillong Mahila Block Trinamool Congress Committee u Dr Mukul u la ong ba kawei na ki rukom kaba kane ka sorkar ka mlien bha ban leh haba don kano kano ka jingïakhih ka dei beit ka jingkhang internet khnang ba ki paidbah kin ym ïoh ïakren ne kdew shuh ïa ka jingbym lah ka sorkar MDA ban synshar ïa ka jylla.
“Ngi la synshar la katto snem bad ha ka por ba ngi synshar ruh ki mih bun bah ki jingïakhih kiba kum kine hynrei ka jingïapher ka jingleh ka sorkar ka long ba ha kito ki por ngim ju khang internet hynrei ngi lah beit ban wanrash ïa ka shongsuk shongsaiñ wat hapdeng ki jingïakhih ba lah ban mih ki jingkulmar hynrei kane ka sorkar mynta mih tang kawei ka jingïakhih kaba nyngkong tam kaba kin leh ka dei beit ka jingkhang internet bad kane ka jingleh ka sorkarMDA ka long beit ban pynkbum jubor ïa ka sur u paidbah namar kim lah shah ban peit ba kin shah kynthoh namar ka jingbym lah ban synshar ïa ka jylla” u la ong.
U la ong ruh ba ka jingbym lah ka sorkar ban synshar ka paw pylleiñ pylleiñ ha kaba ïadei bad ka jingjia ha Mukroh.
“Kaei kaba jia ha Mukroh kam dei ban jia kumto lada dei ba ka sorkar ka shim ki sinejam kiba ka dei ban shim hapdeng ki ar sorkar. Kaba jia ha Mukroh kam dei ba mih kano kano ka jingïasngewpher jaidbynriew hynrei ka dei beit ka jigleh da ka bor sorkar” u la bynrap.
U la ong ruh ba ka jingshim bynta ki kynthei ha ka saiñ hima sima ka long kaba donkam haduh katta katta bad dei namar kane ka daw ba ka nongïalam ba ha khlieh duh ka AITC ka Mamata Banerjee ka don ka thong ba kyrpang ban ai lad ïa ki kynthei ban mih sha khmat ha ka saiñ hima sima ban ban ïakhun ilekshon ruh namar ka don ka jingsngewthuh ba shai bha ba ki kynthei ki lah ban pynliem lyndang wat ïa u radbah ha ka saiñ pyrthei uba kin hap ïakhun pyrshah.
U la ong ruh ba lada peit na kiei kiba ka sorkar kaba u ïalam ka leh myshuwa bad kiei kiba ka sorkar mynta ka leh mynta ka ïapher bha namar ki kam pynroi kiba u wanrah ka da ai jingmynstoi shisha ïa ki nongshong shnong ka jylla.
Ha kane ka sngi la wan shim bynta da ki bun spah ngut ki kynthei jong ka North Shillong ban pynsngew ïa kaei kaba kum ki kynthei ki angnud ban ïohi ïa ka jingkylla bad ki kam kiba ka sorkar ka leh.