Ka jingkdew kti ïa ka KSU ka dei tang ka jingtap eitmiaw ïa la ki jong ki jingbakla: President KSU

Shillong, Naiwieng 30: U President jong ka KSU Sengkmie u Bah Lambokstarwel Marngar ha ka sngi Saitjaiñ u la kynthoh kylla ba ka jingkynnoh jong u Vice Chancellor ka skulbah NEHU u Prof. PS Shukla ïa ka Khasi Students Union (KSU) ka dei tang ka jingpyrshang tap eitmiaw ïa la ki jong ki jingbakla
“U Vice Chancellor ha ka jingkynthoh jong u, u la pynpaw ruh ïa ka kyrteng jong ka KSU bad une u briew u kwah ban tap eit miaw ïa ki jingbakla jong u bad ïa ki jingbym ler ïa ki rukom treikam jong u bad u la sdang ruh ban kynnoh ïa ka KSU. Kum une u jait briew u la sdang ban ïalam bakla bad sait khuid ïa ki jingduna la jong. Kum ka seng kam lah satia ban pdiang shuh ïa u (Prof. PS Shukla) ban long kum u Vice Chancellor ha NEHU,” ong u President ka KSU u samla Lambokstawell Marngar haba ïakren bad u nongthoh khubor.
“U ladei ban sngewrem bad ban shim ïa ka jingkitkhlieh ïa ka jinglong thurmur, ïa ka jingbym ïaid beit ïaid ryntih bad ka jingbym biang ki rukom treikam hapoh kane ka skulbah bad kaba la pynlong ïa ki samla pule ba kin hap ban shong shah thngan hapoh ka jaka pule,” la kynthoh u samla Lambokstawrell Marngar.
“Kane ka pyni ba une u khliehduh jong kane ka skulbah um don ha ka jingpyrkhat pyrdaiñ kaba biang bad ka jingbym kitkhlieh. Ka jinglong jingman kumba ka long mynta ka la buh ha ka jingeh ïa ki samla pule ha ki kyrdan pule bapher bapher, kynthup ïa ki nonghikai ki nongtrei bad la ïohi ba kane ka jaka pule ka la hiar ha baroh ki liang,” u la ong.
Ka Ministry of Education ka Sorkar Pdeng ka la thung ïa ka kynhun tohkit kaba arngut ki dkhot ban pynlong ïa ka jingtohkit hadien ba la ïoh pdiang ïa ki jingujor na ki samla pule, na ki nonghikai bad na ki kynhun bapher bapher. Ka kynhun tohkit kan aiti ïa ka kaiphod hapoh 15 sngi sha ka Sorkar Pdeng.
Da kaba pynpaw, katba ka jingtohkit ka dang ïaid, u Prof. Shukla um pat dei ban leit shimti ïa ka kam ha NEHU, u President ka KSU u la ong, “kane ka jingtohkit ka dang ïaid bad katba (ka kynhun tohkit) kam pat lah ban ai ïa ka kaiphod u Vice Chancellor um pat lah ban shimti biang ïa ka kam ïoh lehse une u briew u lah ban pyndam ïa ki sakhi satar.”
“Ngi la shu ïohsngew ba ki nonghikai bad ki samla pule ki la lum ïa kita ki kam beain jong une u VC bad la ïohsngew ruh ba la phah ïa kane sha ka Ministry of Education bad ngi ngeit skhem ba ka Sorkar Pdeng kan ai ïa ka jingbishar kaba hok khnang ba une u Vice Chancellor un ym ïoh jaka shuh ban dang long u khliehduh ha NEHU,” u la bynrap.
Haba kynthoh shuh shuh ïa u Prof. Shukla, u samla Lambokstarwell Marngar ula ong, “ha ka jingshisha u ladei ban sngewrem bad ban shu iehnoh da kaba don burom hynrei ha ka jaka ban leh ïa kane une u briew u la pyni ba u kwah ban ïaleh pyrshah im im peit peit ïa ka sur ki samla pule bad ïa ka sur ki nonghikai.”
“Haba peit ha kine ki sngi ba don ki jingïakhih kiba bun naduh ki seng samla shnong, ki seng longkmie, ki dorbar shnong ki la pynpaw ïa ka jingsngewkhia halor kane ka jinglong jingman bad na ka liang jong ka Mawlai Town Dorbar ruh ka la ai da ka jingkren kaba khlaiñ ba kin ym shah ïa u Vice Chancellor ban wan iuhjkat ha kane ka jaka pule,” la pynkynmaw u samla Marngar.
“Ngi don ka jingngeit ba ka Mawlai Town Dorbar kan sa leh ïa la ka jong ka bynta bad ka KSU ruh kan sa peit ha kato ka sngi kaei kaba dei ban leh bad tang kawei ka long ba ka seng kam kwah shuh ba une u juh u briew un dang wan iuh kjat ha kane ka skulbah bad ba um dei ban wan pynkulmar, ban pynhiar arsut ïa kane ka skulbah,” la ïai ban u President ka KSU.
Haba kylli, u la ong, “ka seng ka kwah ba kane ka jaka pule kan kiew kan ïaid shakhmat hynrei ka jingbym lah bad ka jingbym ler jong u (Prof Shukla) ka la pynhiar arsut bad hynrei lada u tbit bad u nang ban pynïaid kan ym pynlong ïa kane ka skulbah bad ïa ki samla pule ban hap shah thngan naba la ïohi ba ki samla pule ki nonghikai ki la buh ïa ki jingdawa naduh ki snem 2022, 2023, hynrei um shym la suitniew,” bad bynrap, “kane ka pyni ba u pynlong ïa ka NEHU kum ka nongkynti shimet jong u ne ka phyllaw iing jong u. Hyrnei ka skulbah ka dei ka jaka ban ai ka jingpule hynrei u la pynlong pynban kum ka iing la jong, kumta ka KSU, ka NEHUSU bad ka seng ki nonghikai ka khmihlynti ba ka Ministry of Education kan ai ka jingbishar kaba hok halor kine ki mat jingdawa kiba la sahteng.”