Ka jingtrei shtom ki bor pulit bad ka jingkloi ban ïasnoh kti lang jong ki paidbah nongshnong shnong, ka sei ïa ka khubor ka jingïoh ban kem ïa ki samla kiba ym tang ba ki la ngop ha kaban dih ïa u drok, hynrei ban kylla long pynban ki snar nongkhaii ia une uwei pat na ki jait jingdih uba shyrkhei bad bym lah ban tip haduh katno kan sa ktah jur pat ïa ka imlang ka sahlang hi salonsar. Mynta lada shem ïa kynduh ïa ki briew lada dei ha ki ïing ba iap briew, ha ki dukan bam ne ha ki jaka ïatrei kam bad ki ïew ki hat, kum ki paidbah ki sngew shyrkhei lem ban ïoh sngew ne wat ban da ïohi syndon ba ki samla ki long kiba shlur, ki bym tieng ne riej naka bynta ban long kum ki nongdie, namar ba ka spah kamai kane shew shew ka jur bad shlei kynsan ha ka jingim ka jong ki.
Hangne da shisha hap ban pyrto ïa ka jinglah ban trei borbah ki bor pulit naduh ki pulit ka nongbah haduh ki pulit ba dei jong ka tnat custom ba don ha kane ka nongbah, hynrei ban lah shisha ban rat dyngkhong ïa u drok, donkam shisha ban ïoh ïa ka jingïatrei lang ruh nala ki paidbah nongshnong shnong bad kumjuh na ki dorbar shong. Ka kyiad long katba ka long dang lah ban tehlakam ïaka, dang shem raiñ ruh ban die pathar ïaka namar ka rukom ban rah ban rong ïa ka, kham jwat bha ban lah ban burieh, haba dih ruh,ym da nud than eh ban dih bun, namar tieng ïoh sieng ïewbih ka jingsma bad ba kloi ruh ka jingshah samtawi bym lah ban tip briew shuh shipor, pynban u drok, tang shi tyndong tin (golden), ka la khring ïa ki samla ban kylla long ki nongdie ïa u, namar suk ban burieh ne ban rah ha la ka jong ka met, kaba pynsuk ruh wat ïa ki samla nongthied.
Kaei kein kadaw kaba kloi ban pynngop ïa kiba bun ki khun samla ban kdat sha ka jingim kylla men dih drok, mano ba wan ban bet pat ïa kum une u jait symbai, uba wei shisien ba la ngat, la eh ban pynduh ïa ka jingmlien ban dih ïa u, nangno keiñ ka hajar ynnai ïakren ia ka spah, kaba ki khun samla ki ïoh naka bynta ba kin thied ïa u, kine ki long ki jingkylli kaba kum ki kmie ki kpa kin hap ban shong pyrkhat sani bha. Hynrei sngew pap ban tei pop ïala ka kmie u kpa ba lah ba ïai ba bsa ba btiah ïa la ki khun, namar ha ka jingïeit thep mynsiem palat ïala ki jong ki khun, klet te ban tehlakam pat ïa kata ka jingieit, hynrei khlem da pyrkhat bad khlem da puson aimon beit ïala ki khun, ka pisa ruh shew shew ai beit katba ki pan, ym juh buh jingkheiñ ne ym juh kylli ruh balei ba ki donkam palat pud ïa ka pisa, haba la dep lypa ban pynbiang nadong shadong.Shuh shuh ha ka jingim ïa beh naka bynta ban kamai ban kajih, ki khun samla, kim ïoh shuh ïa ka lad ban shong ban sah ryngkat bun bun ka por bad la ka kmie u kpa, mynstep la shu bunkam ka khreh ka khrum ban her sha laki kam ki jam, katba ki khun pat ym don por shuh ban kylli ban pyrthew ne ban buddien aiu ki khun ki im, ki long ki man, la ki don ma ka jingkylla haka rukom im ka iaid ka ieng ka bam ka dih, ka thiah ka dem ka kup ka sem ba manla ka sngi ka jong ki.
Dei namar ba la shu ïa beh palat ïa ka jingim ban kamai ïaka spah, ki khun ki shu kylla long tang kum ki khun ba khlem sneng, bym don ba ïa syllok shuh bad ki, hangne keiñ ki samla kiba bun, ki shah pynngop shah pynbiej hala ki paralok, katno tam lei lei haba don ka tyngka ha ka kti, kilok kine kyrhai, ki kloi ba kin tan lem bad ïa ki sha ka shrip ban ngam jyllop ha u drok. Hynrei kaba kham I shyrkhei lei lei hangne ka long ba ka jingïoh ban kem ïa ki khun samla, kiba kylla long kum ki nongkhaii bad die ïa u, ka daw baroh ka long ba ha ka juk hiran ka kam ka duk, ka bor pyrkhat kaba dang lui lui ki khun samla, ki shoh samtawi pat ki khmat bad ki jawdud pat ha ka mynsiem haba ki shem bad iohi ia ka lut stem ia ka lut pink jong ka tyngka, kaba tang shi tyndong u drok, shi miet ïa shai, lah ban pynïoh lut ia ka rongphong jong ka pyrthei.
Haba la sdang lei lei ban ïoh bha, sdang ruh ban ïoh ban mad ïa ka jingim kaba pahuh kaba pahai, ka jingim kaba khlem da pyrkhat sani bha sngew shisha ba ka pyrthei dei ka paradise, namar ki lok na kadiang bad na kamon, kine hai hai ki ïa boi la kum ba boi u ngap ïa u syntiew, ban ioh ban ia kjit lem ia ki umba bang bad kiba thiang.
Kumta, donkam bha nangne shakhmat ïa ka kmie u kpa, ïa ka iingkasem ka shomng ka thaw ban buddien bha ïa ka ïaid ka ïeng ki khun samla, ha kaba wei haba sdang ban lap ne ban shem ia kino ma kino ki kam ba phyla, mardor donkam ban ïa syllok ïaki, ne ban wad ïa ki daw, balei ba shu san kylla ba kylla ka dur khmat, naei ba shu shlei kynsan ka ïoh spah ïoh phew, bad ka rukom im ruh ka da I long kaba I phyla, lymda long lem kiba kloi bania peitngor, ym tip sa katno ngut ki samla kiba la shah pynngop, ha ka dih drok sa katno ki la shah pynngop ha kaban kylla long ki nongkhaii ïa u.
