K a jingshah kem ki mynder na ka ri Bangladesh kiba rung tuh sha ri India ka ïai jia na ka por sha ka por. Na ki kaiphod ba la ai da ka tnat shipai Border Security Force (BSF) kiba pahara ha khappud ki mynder ri kiba shah kem ki phla ba ki rung tuh da ka jingïalam lynti jong ki Dalal kiba dei ki trai shnong ka ri India kiba shong basah ha ki shnong khappud. Kine ki Dalal ki die ïa la ka jong ka ri tang na ka bynta ka jingmyntoi ka malade shimet. Bun hi na ki mynder ri kiba ïoh rung tuh sha u pud u sam jong ka ri India ki phla ba ki wan wad kam ban kamai jakpoh namarba ka ri Bangladesh ka dei ka ri ka baduk bad kaba duna ha ka ïohkam ïohjam.
Ka jingkhie ka jingïaumsnam ha ka ri Bangladesh ha u bnai Nailar, 2025 kaba la lam shaduh u pud ba ka Myntri Rangbahduh ka Sheikh Hasina kan da hap ban phet rieh na la ka jong ka ri ka la nang kynton shuh shuh ïa ka jinghiran ha ka ri Bangladesh namar ka jingshah ktah ha ka shongsuk shongsaiñ. Kiba bun ki nongshong shnong ka Bangladesh ki phet rieh sha India ban wad ïa ka lynti kaba thymmai la ka long da kaba wan lyngba ka Visa lane da kaba shu rung tuh na khappud.
Haduh mynta, ka Sorkar India ka la tei ïa ka jingker sainar shiah kumba 79% ha khappud jong ka ri India-Bangladesh ban khanglad ïa ka jingrung tuh ki mynder, ban khanglad ïa ki kam runar ruser, ban khanglad ïa ki jingkhaïi tuh bad kiwei kiwei ki jait kam. Ka khappud hapdeng ri India bad ka ri Bangladesh kaba ladep ban ker ka long kumba 3,232.218 kilomitar na ka jingjrong kaba 4,096.7 kilomitar. Katba ka khappud kaba dang sah sa 864.482 kilomitar ka dei ka bym pat lah ban ker sainar namar ka jingpyrshah jong ki trai jaka kiba kam ba kin duhnoh ïa ka khyndew ka shyiap kaba ki la ïoh pateng na ki kpa tymmen bad kane ka la buh jingeh bha ïa ki bor synshar District ha Meghalaya ban weng ïa kane ka jingeh. Hynrei watla katta, ka sorkar jylla ka la pyrshang katba lah ban pynsngewthuh ïa ki trai khyndew bad ki bor synshar shnong ba ka jingker ïa u sainar kan long hi ka jingïada na ki kam runar ruser kiba ju jia khah khah ha khappud kumba la sakhi ha ki snem baladep.
Dang shen ka jingïohkem jong ki Pulit ka Jylla Meghalaya ïa ki mynder ri na ka nongbah Mumbai kiba donkti ban pynrung tuh ïa ki nongshong shnong ka ri Bangladesh sha India ka pyni ba ka don ka Network kaba khlaiñ bha jong kine ki mynder kiba ïaleh kumno ban pynshna ïa ki Pan Card bad ki Aadhaar Card thok khnang ban pynlong nongshong shnong India ïa ki mynder na ka ri Bangladesh. Lehse lah ban ong ba kin dang don bun byllai ki mynder ri kiba la ïoh rieh tngen ha kane ka jylla Meghalaya da ka buit shukor ba pynthame ïa ki bor sorkar. Lada ïanujor ïa ka jingkharoi jong ki briew kiba nabar jylla Meghalaya ha ki snem kiba mynshwa bad ha kine ki snem kiba mynta ka la kiew bha haduh katta namar lada kheiñ thik tang ïa ka jingdon jong ki trai shnong kan ym pat kynjoh sha ka 22 lak tam. Hynrei ka jingkharoi na ka jingwan buhai shnong jong ki mynder na ka ri Bangladesh bad ki briew kiba nabar ka jylla ka la kiew stet bha katba ki sngi, ki bnai bad ki snem ki nang tyllun.
Watla ki dorbar shnong, ki seng samla shnong bad ki kynhun bapher bapher ki ju peitngor bha ïa ka rung laitlan jong ki mynder na ka ri Bangladesh khamtam ha ki shnong khappud hynrei ka jingbym pat lah ban ker ïa u sainar shiah ha ki katto katne ki bynta jong ka khappud ka jylla Meghalaya bad ka ri Bangladesh ka la long kum u mawjynthud kumba la sakhi ba ki kynhun sengbhalang kiba ïohkem ïa ki mynder ri kiba rung beain lyngba ka East Jaintia Hills ki leit rieh tngen ha ki Karkhana ban ïoh jaka rieh bad ban ïoh kam ïohjam. Lada kine ki jingjia ki dei kiba shisha, ka tnat Pulit kam dei satia ban ap haduh ban da ïoh ujor hynrei ka ladei ban phah pynlong ïa ka jingtohkit kaba bniah ha ki karkhana kiba don ha rilum Jaiñtia. Dei ban kem mardor katkum ki kyndon aiñ jong ka ri.
Ka jingwan rung be-aiñ jong ki mynder ri tang ban ïoh kamai jakpoh ki knieh noh wat ïa ka pliangja jong ki trai shnong, ki trai ri trai muluk. Kam myntoi ïa ka Sorkar ba kan kyndit bynriew ynda ka um ka la kiew haduh ryndang hynrei ka la dei ban pyntreikam noh mardor ïa ka iktiar ba la pynkupbor ban kyndang naphang ïa ki mynder ri khnang ba kin ym ïoh lad ban pynlong ïa ka jylla Meghalaya kum ka jaka riehtngen bad ka bneng na ka bynta jong ki.
