Ka jingïoh khusnam jong nga ka jingmyntoi lang ïa baroh ki nongrep ong u bah S.Marshra

Nongstoiñ Nohprah 29: U bah Spingwell Marshra sordar ba rim jong ka shnong Mawduh u dei uwei na ki nongrep uba trei shitom bad uba don ka jingstad kaba kyrpang ha ka kam rep kam riang.Utei u rangbah u dei ruh u nongprat lynti uba nyngkong eh ha kaba rep ïa u soh strawberry ha West Khasi Hills bad naduh ba u la sdang ïa ka jingrep soh strawberry ka sorkar lyngba ki tnad trei kam kiba dei peit ïa ka rep ka riang hapoh ka jylla ki la hap ban kohnguh ïa kiei kiei kiba u pyni bad batai ïa ka rukom rep ,ki jait jingthung, ka aïom bad ka khyndew kaba kumno ba u jingthung u ïadei bha ban rep.
Nalor kata hadien katto katne snem ba u la sdang ban rep strawberry u la sdang sa ban shna waiñ na utei u soh bad kiwei kiwei ki jait soh kata naduh u soh ïong (black berry) ha ka ktien nongwei, u soh phareng (peace) u sohphoh Nonghlaw, bad kiwei kiwei ki jair soh kiba mih hi ha khlaw.
Ha kajuh ka por utei u rangbah u dei ruh u riew ieit mariang uba la pyni da ki kam da kaba sara ïa ki jait dieng ba bun jait ban thung ban ban tip ha kaba kum kano ka khyndew u ïadei bad ki jait dieng aïu kiba donkam ban thung ha la ki jong ki jong ki aïom jong ka snem.
Ka jingtrei shitom jong u ka la pynlong wat ïa ki stad mariang kiba na kiwei pat ki ri ka pyrthei ba kin wan jngoh ïa ki kam kiba u trei na ka por sha ka por.Ha ki snem ba la dep ki riewstad saïan kiba dei peit ïa ka rep ka riang, ka jinglong jjngman ka mariang haduh ki saïantis kiba dei peit ïa ka rukom pynmih waiñ ki la wan man ka por ban ïa kynduh bad pynïadei para lok bad u.
U bah Marshra ym tang ba u lah ban pynkohnguh ïa ki ophisar sorkar kiba dei hapoh ka district hynrei ka jinglah jong u ban pyntrei kam hok ïa ka jingstad bad ka jingshemphang barieh jong u ha ka kam rep kam riang bad ban thaw ki lad ban pynjyrngam pat ïa ka mariang ka la poi haduh ki tyndong shkor jong u Myntri Ranbahduh ka ri u Narendra Modi ha kaba u Myntri Rangbahduh u la khot kyrpang ïa u sha Nongbah Delhi ban ai ïa ki khusnam bapher bap her.
Nalor kata ha kine ki khyndiat taïew ba la dep ka sorkar pdeng ka la khot biang ïa u sha Delhi na ka bynta ban ai ïa kawei pat ka khusnam kaba kham heh shuh shuh kaba la tip kum ka Farmer Millionaire Award 2023.Hadien ba utei u rangbah u la ïoh pdiang ïa katei ka khusnam na ka sorkar pdeng ha ka sngi sait jaiñ ba la dep ki nongïalam ka Hills Farmer Union West Khasi Hills kum ka jingsngewnguh ïa u kum u nongprtalynti ban kyntiew ïa ki nongrep hapoh ka district ki la leit ban ïakynduh ïa u ha ka ïngsah ha Mawduh na ka bynta ban pynkup burom ïa u kum u nongïalam ba shemphang bad uba ïohi jngai ban pynkhlaiñ ïa ka rep ka riang ha kaba kum kane ka juk kaba ki samla ki don hapdeng jong ka jingkyrduh kam.
Ha katei ka sngi la pynlong ïa ka jingïalang ba lyngkot ha phyllaw ïng jong u ha ryngkat ka jingïadon lang jong ki khun ki kti bad ki dkhot jong ka ïng ka sem baroh kawei bad ïa ka jingïalang la pynïaid da u bah Zakhaïus Tympuiñ president ka HFU West Khasi Hills district ha ka jingdon ryngkat lang jong u bah Lumlang Kharsyiemlieh secretary , u bah Alfonbiorth Kharsyntiew secretary ka HFU sengkmie bad kiwei kiwei ki dkhot jong ka seng napoh ka district.U bah Marshra haba aikhublei ïa u Myntri Rangbahduh ka ri bad ka sorkar pdeng u la pynpaw ka jingsngewnguh bad u la aikhublei kyrpang ruh na ka bynta jong ki.
Nalor kata u la ong ruh ba ka jingïoh jong u ïa ka khunsam kum u Millionaire farmer kam dei tang na ka bynta ka jingmyntoi jong u shimet hynrei katei ka jingïoh khusnam jong u ka long na ka bynta ban rah bad kyntiew sha jrong ïa ka nam ka burom jong ki nongrep hapoh ka district bad ka jylla baroh kawei.Ha kajuh ka por u la kyntu ruh ïa ki paitbah nongrep ba kim dei ban duh jingkyrmen wat la ka sorkar jylla haba ka kren na ka bynta ki nongrep ka shu heh tang ka tyngam bad ka jingpyrta jong ki heh sorkar ka jylla ki shu swa jam kum ka wiang rnong ka bym don ei ei .
U la ong ruh ba wat la haduh mynta ka sorkar ka ju ong “ki nongrep bapli “ nagne shakhmat lada ki paitbah nongrep ki trei shitom bad minot thop ha ka kam rep khlem tyngkai ïa ka por, ka buit ka bor bad ka sap klyrpang kaba u Blei nongbuh nonmgthaw u la ai ha ki nongrep kan poi ka por ba ki paitbah nongrep kin sa pyrta paitbah ban ong kylla “ko sorkar bapli ka sorkar dap ram naduh kjat haduh shynrong khlieh” bad ka sorkar ka hap ban pyndem ‘ñiuh mat ha khmat ki nongrep.