Nongstoiñ, Rymphang, 23: Ka Jingïaseng Samla KJP Synod Sepngi kaba arphew lai kan sa long ha ka Balang Presbyterian Nongstoiñ naduh ka 28 tarik Rymphang haduh ka 2 tarik Lber 2025. Ka jaka long jingïaseng ha ka sngi U Trai, kan long ha ka madan harud ka surok Intermediate lane Nongstoiñ-Wahkaji hajan T.B Hospital Nongstoiñ.
Ki nongkren ha ka sngi U Trai ki long por 10:30 mynstep Rev L.Nongrud bad 1:30 noh phai sngi Rev E.L Kharmawphlang. Ka jingïaseng ha ka por 6:30 janmiet kan ha ïingmane bad phyllaw jong ka bad ban kren ïa ka sobjek Balang, “Ka kyrteng jong me ka long kum ka jingiwbih ba la theh noh”, (jingrwai u Solomon 1:3), da u Rev H.K Nongbsap.
Ka Balang Presbyterian Nongstoiñ ka khot sngewbha ïa baroh ki paid riew ngeit ne kynhun Balang bapher bapher, ban ïa wan sha kane ka jingïaseng ha ka sngi u Trai kaba dei 2 tarik Lber 2025.
Shuh shuh, na ka bynta ka bit ka biang ha ka leit ka wan na ka bynta kane ka jingïaseng Synod, la pynbeit ba ki kali kiba wan lyngba ka surok Shillong-Nongstoiñ-Sohpian, kin ieng ha ki parking bad madan kiba don hapoh sor Nongstoiñ. Kiba wan lyngba ka surok Rambrai-Nongstoiñ, kin rung na ka shnong Tiehsaw sha Ladweitang haduh iew Nongstoiñ.
Kiba wan lyngba ka surok Riangdo-Nongstoiñ, kin ïaid lyngba ka surok Nondeiñ-Law ab-Wahriat shaduh shnong Nongstoiñ. Kiba wan lyngba ka surok Maweit kin ïaid lyngba ka surok Nongpyndeng Wahriat shaduh shnong Nongstoiñ. Kiba wan lyngba ka surok Mawkyrwat bad kiba wan na surok Umyiap, kin rung sha ki parking ba don ha u lum jingtep Mawpior hajan jaka long jingïaseng.
Ka Balang Presbyterian Nongstoiñ ka kyrpad ïa baroh ki nongwan jingïaseng ban burom ïa ka jingpynïaid ki traffic Police/volunteer, khnang ba kan ym don kano kano ka jingdheng kali. La kyrpad ruh ïa ki nongwan jingïaseng, ban kiar na ka jingïashong khapngiah ha ki kali bad ban kiar ruh na ka jingpynher sted palat, khnang ban lait na ki jingjia ba sngewsih.
La kyrpad ruh ïa ki nongwan jingïaseng na ki shnong ba marjan kum ka New Nongstoiñ, Upper New Nongstoiñ, Ladweitang, Mawkawah bad kiwei, ban kham kiar na ka jingwanrah kali ha ki por mynsngi namar ki lynti sha jaka long jingïaseng ki dei ki surok bah ba madan bad ba dang jan.
Ka Balang ka la pynbeit ruh ban ym shah ban die jingdie harud ka surok bah Nongstoiñ Wahkaji Mawkyrwat, kumba 200 meter na ka jaka long jingïaseng, khnang ba kan ym don ka jingwit ïa ki nongwan jingïaseng.
