Ka jingïaryngkang dieng kper ki riewsaiñ pyrthei ha Meghalaya ka la ïai bteng, haba ha ka sngi palei palat spah ngut ki nongkitkam bad ki dkhot ka United Democratic Party (UDP) na Nongpoh, Ri Bhoi District ki la mih noh na ka Seng ban leit kyrshan noh sha kiwei ki Seng Saiñhima. Kine kiba la mih noh na ka UDP wat lada kim pat dei ki nongmihkhmat paidbah, hynrei kidei kiba la don slem bha ha ka Party bad kidei ruh kiba la ju don bynta ha kaba pynjop ïa ki nongmihkhmat.
Kane ka jingmh noh jong ki, khlem pep kan ktah ïa ka UDP, kaba la wan ha ka por ba ki nongïalam jong ka Party ki dang khmih lynti ba ka Seng kan lah ban leh bha ha kane ka elekshon 2023 bad wat ban ïalam ïa ka jingsynshar ruh.
Kane ka jingryngkang dieng kper ki UDP ka wan tang khyndiat sngi hadien ba ki la don ki MDC kiba la phet noh na ka Congresss sha ka NPP. Ka lyer ka beh ba imat kin dang don shuh ki MDC jong ka Congress ban phet sha kiwei pat ki Seng.
U paidbah um phylla shuh ïa kane ka jingïaryngkang dieng kper ki Politician, namar ha ka elekshon 2018, ruh wat u Bah Prestone Tynsong, uba ha ka por ba plie ïa ka Pynursla Civil Sub Division u la ïaroh tyngeh ïa u Dr. Mukul Sangma. Phewse tang hadien khyndiat bnai u la iehnoh ïa u Dr. Mukul ban leit pynasoh noh bad ka NPP. Kumjuh ruh u Bah Sngiawbhalang Dhar, u Bah Coming One Ymbon, u Bah Ngatlang Dkhar kiba long ki MLA.
Ka jingïakren u luk u lak kam dei eh ïa ka jingleit pynasoh ki 5 ngut sha ka Sorkar, hynrei kaei kaba ki ïakren ka long ba kine ki 5 ngut kin dang don ha ka Congress ne kin ryngkang dieng kper noh ynda ki la sngewthuh ba ka por kam leu lei shuh ba kin shah mait kyrteng kum ki MLA. Kiba la kham paw ban ryngkang dieng kper na ka Congress ki long u Bah Process T. Sawkmie sha ka UDP bad i Kong Ampareen sha ka NPP. Ki lai ngut kiwei pat la shu bna wur wur wer wer ba ki lah ban leit noh sha ka NPP.
Kane ka jingïaphet Seng ha shuwa ka elekshon ne ka jingpan ticket na kawei pat ka Party da kaba iehnoh ïa ka Party la jong, kadei kaba jia la slem bha ha kane ka jylla bad kam dei ruh kaba jia tang hangne, hynrei kadei kaba jia ha kylleng ki jaka jong ka ri India. La ïohi ba ha jylla Uttar Pradesh, kiba bun ki Myntri sorkar kiba dei ki MLA ka BJP ki la phet noh sha kiwei pat ki Seng. Nangta na kiwei pat ki Seng kum ka Congress, ka Samajwadi Party bad kiwei kiwei ruh ki ïaphet kylliang kumne.
Haba phai sha kane ka jylla, la ïohi ba ki Party kiba kham rit kin dei ki Party kiba kham duhnong ha kane ka jingïaphet Party. Ki khubor ki pynpaw ba ka Seng Peoples Democratic Front (PDF) ka lah ban dei ka Party ka ban duhnong eh ha kane ka jingïa ryngkang dieng kper shuwa ka elekshon. Ka Seng Congress ka dei ka Seng kaba la duh lypa 12 ngut ki MLA kiba la ryngkang dieng kper noh sha ka Trinamool Congress. Ka Congress mynta ka sah satang 5 ngut ki MLA bad ki dak ki shin ki pynpaw ba imat kin dang don shuh kiba ryngkang dieng kper na ka Congress. Na ka UDP haduh mynta ym pat i don dak ne ïoh sngew eiei ban don ki MLA ki ban ryngkang dieng kper, hynrei wat la katta ruh ym tip ha ka saiñpyrthei kaba kylla sted shuwa ka elekshon. Ka HSPDP ruh ka lyer ka beh malu mala ba napdeng ki arngut ki MLA, lah ba don kiba ryngkang dieng kper uwei ne baroh arngut syndon.
Na ka NPP ruh haduh mynta ym pat paw dak eiei, pynban ki khubor ba napoh napoh ki ïathuh ba lah ban don kiba ryngkang dieng kper ha shuwa ka elekshon 2023. Ym lah ban tip ba wat napdeng ki MLA kiba dang rung thymmai sha ka Trinamool Congress ktno ngut ki ban dang neh ha kajuh ka Seng kat ban poi ka elekshion 2023.
Lada phai lei lei sha ki MDC, kiba ym shah teh ha kano kana ka kyndon aiñ, kiba bun ki la pynkhreh lypa naduh mynta bad wat lada ki long ki MDC jong ka Party ba ki jop, hynrei ka jingtreikam ne ka rukom leh jong ki, ka long la kum ki MDC jong ki Party ba ki thmu ba ïakhun ïa ka elekshon 2023.
Kane ka jinglong ka pynngiah hi shoiñ ïa ki paidbah nongjied bad khamtam ïa ki nongtrei bad ki nongkyrshan jong ki Party kaba la pynjop ïa ki. Kiba bun ki nongtrei bad ki nongkyrshan ki la pynlut ïa ka bor bad ka por jong ki na ka bynta ban pynjop ïa u kyrtong ba ka Seng ne ka Party kaba pynïeng, hynrei kane ka jingryngkang dieng kper noh ki nongmihkhmat ka pyntlot bad ka pynthait noh ïa ki nongtrei bad nongkyrshan jong ka Party bad kane kadei kawei na ki daw kiba pyntlot ïa ka jingtreikam ki Political Party ha Meghalaya.
Imat ka por ka la dei ba ki paidbah nongjied kim dei shuh ban jied nongmihkhmat da kaba pynshong nongrim ha ki Party hynrei ladei ban pynshong nongrim noh ha ka jinglong u briew shimet ne ka rukom treikam jong u. Ym dei shuh ban peit ïa ki manifesto jong ki Party, namar ba kine kim don jingmut eiei haba ki MLA, ki MDC ki iaphet ïa rung Party katba ki sngew bit.