Shillong, Jymmang 26: Ka executive council (EC) meeting jong ka North Eastern Hill University (NEHU) kan long ha ka 30 tarik mynta u bnai.
Haba ïathuh ïa kane ha ka sngi Nyngkong u MP ka Rajya Sabha u Dr WR Kharlukhi u la ong, “Nga dang shu wan na ka prokram ha NEHU. Nga tharai ka sorkar ka la dep ban ïa pynbeit bad kin sa don ïa ka executive council meeting ha Delhi ha ka 30 tarik mynta u bnai.”
U la ong ba ïa ka EC la khot ban pynlong ha Delhi ban ïasyllok ïa kaei kaba la jia bad kaba la mad ha kane ka University.
U Dr Kharlukhi u la ïohi ruh ba ka jinglong jingman ha NEHU ka la wanphai biang kumba julong hadien ba la shimti ka Acting Vice Chancellor ka Prof Sherwin M Sugnoh.
“Da ka jingdon ka acting Vice Chancellor kaba la shimti ïa kane ka kam, ka jinglong jingman ka la khambha. Mynta ka sngi ngi la don ka jingïalang bad ki nonghikai, ki samla pule ruh ki la donlang. Ka kam ka la khambha bad ka la long kumba ju long baroh shikatta,” u la ong.
Halor ka jingdawa ban weng noh ïa u VC ka NEHU uba dang bat ïa ka kam u Prof PS Shukla, u Dr Kharlukhi u la ong, “To ngin ïa ap na ka jingmih jong ka EC meeting bad dei tang hadien ba ngi lah ban shim ka rai kaei kaba dei ban leh.”
Dangshen, arngut ki dkhot kiba dei ka kynhun na ka sorkar pdeng na ka Ministry of Education ki la wan jngoh ïa ka Shillong ban bishar kam halor ka jinglong jingman bad ki jingtreikam jong ka NEHU.
