Ka jingïakren pynbeit pud hapdeng ka Meghalaya bad Assam, ka wat kaba ar shen yn sdang noh: CM

Shillong, Jymmang 14: U Myntri Rangbah ka jylla u Conrad K Sangma ha ka sngi Palei u la ong ba ka jingiakren bad ka Assam halor ka bynta kaba ar jong ka jingiakren pynbeit pud ban ha ki hynriew tylli ki jaka kiba dang sah jong ka jingiaren yn sa sdang noh shen, ynda la bam smai ïa ka sorkar thymmai ha Assam.
Haba jubab ïa ki jingkylli halor ka jinglong jingman jong ka jingiakren pud hapdeng ki jylla, u Sangma u la ong ba ka jingtreikam kan sdang biang hadien ba la sangeh shipor.
“Ka sorkar thymmai kan dang hap bam smai ha Assam.Namarkata, to ai ba kan iaid shwa katto katne sngi.Ngan sa ïa kren bad u Myntri Rangbah ka Assam bad thikna ba ngin sa rah ïa ka jingiakren shen bha”, la ong u Sangma ha ki nongthoh khubor.
Ka bynta kaba ar jong ka jingiakren ka kynthup ïa ki hynriew tylli ki bynta kiba dang sah jong ka jingiapher hapdeng kine ki ar tylli ki jylla – ka Langpih, ka Borduar, ka Nongwah-Mawtamur, ka Desh Doomreah, ka Block I & Block II, bad ka Psiar-Khanduli.
Ïa ka bynta ba nyngkong jong ka jingpynbeit pud la pynkut ha u Lber 2022, ha kaba baroh ar tylli ki jylla ki la iasoi ia ka memorandum of understanding ha New Delhi ha ka jingdon lang u Union Home Minister u Amit Shah ban pynbeit ïa ki hynriew tylli na ki 12 tylli ki jaka ba don ka jingkajia pud.Kane ka jingiateh ka kynthup ïa ka shnong Tarabari, Gizang, Hahim, Boklapara, Khanapara-Pillangkata, bad Ratacherra.
U Sangma u la pynpaw ba ka sorkar jong u ka dang angnud ha katei ka kam.”Ngin sa rah thikna ïa ka jingiakren shakhmat”, u la pynkynmaw biang.