Ka jingdon ki skul Mission ka pyntngen ïa ki kmie ki kpa namar ka bai skul ka duna: Lambor

Shillong, Ïaiong 14: Namar ka jingthrang ban kyntiew ïa ka pule puthi, u MLA bad MDC barim ka Nongkrem uba dei ruh u Co Chairman jong ka State Law Commission jong ka sorkar jylla u Bah Lambor Malniang mynta ka sngi u la plie paidbah ïa ki karma klas ba thymmai jong ka Laitkor Presbyterian Secondary School.
Ïa ka jingtei ïa kine ki kamra klas ba thymmai u Bah Lambor u la pynioh lyngba ka Chief Minister Special Development Fund (CMSDF) bad ka mang tyngka ka long 10 lak tam bad ha kane ka sngi ba plie la ia don lang naduh ki pastor, tymmen basan bad kiwei kiwei de ki riew rangbah.
Nalor kine, la wan ban pynshngain lang ruh da ki kmie ki kpa jong ki khynnah skul, ki khynnah skul bad kumjuh ruh ki nonghikai kane ka skul.
Haba kren ha ka jingialang ba lyngkot u Bah Lambor u la ong, Ha kaba iadei bad ki kam skul mission um ju kwah ban ai ha ki contractor ban phah shna hynrei u aiti beit ha ki nongpyniaid jong ka skul khang ba lah ban shna bha ïa ka.
Ban da aiti ha ki contractor ka skul kan ym ïoh bun, hynrei da ka jingaiti ha ka Managing Committee ka skul jong phi kala ioh kumba phi la sakhi hi bad kane kan iarap namar katba dang mih ki sngi ka jingbun ki briew ruh kala nangroi ong u Bah Lambor.
Shuh shuh u Bah Lambor u la kular ruh ban pynioh biang sa T. 5 Lak ban shna sa ïa kaba sah bad u la kyntu ïa ki bor pyniaid jong ka skul ba kin pynkloi ban ai da ka jingthoh ban sted ka kam.
“Ka jingdon jong ki skul Mission, ka pyntngen ïa ka mynsiem jong ki kmie ki kpa khamtam eh kito kiba wan na ka long ïing ba duk bad kiba duna ka jingioh namar ba ki skul mission ki duna ka bai skul ym kum ki skul ba pyniaid ki riew shimet” ong u Bah Lambor
Shuh shuh u Bah Lambor u la kren ruh halor ka jinghiar dor ha ka rukom kynthoh jong ki paidbah ha ki comment ha ki social media pyrshah ïa u, hynrei kam pher namar ba ngi khlem leh ïa kaba sniew bad ngin iaid beit ïa ka kam sha khmat.