Ka jingat snieh doh ki masi ka syrïem kum u ‘ñiang pyrsit, ong ki nongri masi

0

Nongstoiñ, Naitung, 19: Ka jingmih khñiang jong ki masi ka la kynjoh lai bnai kynthih haduh mynta, hynrei ki dang don shibun ki masi kiba ka jingmih khñiang ka dang bteng wat la kam da jur shuh kum ha ki bnai ba la dep, ong u bah H.Wahlang uwei na ki riew tymmen u ba im ha ka kam ri masi.
U bah Wahlang haba ïakren bad u nongthoh khubor, u la ong ba ha u bnai Jymmang ha ka por ba ki masi ki dang sdang ban mih ki khñiang kiba pyllun ha ki bynta jong ka met, imat wat ki masi ruh ki tyrha bad ki pisa namar ka jingjur ka jingshit bad ha ka por ba shit sngi ki ïaleh beit ban bam phlang hajan ki jaka ba don um bad ha ka shi sngi da ki phew sien ki leit dih um.
U la ong ruh ba u la pyrshang ban ai da ki dawai hynrei kam shym la ïarap satia, tangba suki suki ki don kiba mih prum na ki bynta ba u khñiang u mih bad ynda la jaw snam bun bun sngi, ki jaka ba prum ki sdang tyrkhong lada tah da ki kynja dawai kiba u skaiñ um boi shuh.
Uwei pat u rangbah kata u Bah S.Nongphud, u la ong ba ha ka por ba ki masi jong u ki sdang mih khñiang u la pyrshang ban ai dawai, hynrei kam shym ïarap bad haba u peit bniah ïa ka jinglong jong utei u jait khñiang u ïas yrïem bha bad u ñiang pyrsit ba mih ha ki khunlung.
U la ong ruh ba ki don ki masi kiba ïap lada bakla ban pyndih dawai. Hynrei kaba lyngngoh ka long ba ki tnad treikam jong ka sorkar kiba dei khmih ïa ki jingri jingdup, hadien ba ki la ïoh jingtip ba ka don ka jingmih khñiang ha ki masi, kim shym phah jingtip ha ki nongsynshar shnong ba kin bthah ïa ki nongri masi, ba kin pyntip sha ka sorkar ba ki ri masi katno tylli bad katno ki don kiba mih khñiang bad katno ki ba lait, hynrei la shu pynbna tang lyngba ki lad pathai khubor ba ka sorkar ka la khang ban ot doh masi.
Ha kaba ïadei bad ka jingmih khñiang jong ki masi u bah M.Nonglang u la ong ba utei u jait khñiang u lah ban ïabit ïa ki sniang ruh lada la pyllait ïa ki masi na sem bad la ñiah sha lum man ka step najan ki sem sniang bad ïa kata u la lap ïa ki sniang ha sem jong u.
U la ong ruh ba ka long kaba shitom haduh katta katta ban pynjem ïa ki sniang ruh, namar shisien na ka bynta ba utei u khñiang u mih ka snieh ka khoh kumba theh da ka um khluid bad ka nang heh suki suki. U la ong ruh ba u la pyrshang ban ai dawai bun bun sien hynrei kam jem satia bad haduh mynta u dang pyrshang ban wad dawai na ka bynta ban pyrshang ïoh lehse kan ïarap.
Nalor kata la ïoh jingtip ruh ba ha kine ki sngi ka don sa kawei pat ka jait jingshitom ha ki sniang ka bym pat lah ban tip namar ki sniang ki shu ïap khlem ithuh ba ki shitom ei ei. La ong ba ka jingïap jong ki sniang ka la jia ha Khyllemtiehsaw bad ha ki thaiñ Nongkasen ha kine ki sngi.
Katkum ki jingtip ba la ïoh la ong ba u sniang haba leit ai bam mynstep u dang bam kumba um lei lei. Hynrei ynda leit peit ha ka por janmiet u la ïap, nangta ki don kiba baroh shi shi sngi haduh por ba lei tai bam ynda janmiet um lei lei hynrei mynstep pat u la ïap.
Katei ka jait jingshitom kaba phylla bha bad ka donkam ba ki doctor bad ki nongwad bniah ïa ki jait jingshitom ha ki jingri bad ki mrad ki mreng, ki dei ban wad ïa ka daw bad ban lap ïa ka jait jingpang khnang ba kin lah ban ïoh ïa ki dawai ban ïada.

Leave A Reply

Your email address will not be published.