Shillong, Naiwieng 17 : U Bah P.T Sawkmie, MLA barim u la ong ba ka jaidbynriew ba kyrpang ka dang im bad kan nangroi nangpar haba ïa ka jait ka kynja dang bat da ka kmie.
“Kum ka jaidbynriew kaba kyrpang ngim dei ban ailad ïa kito kiba kwah ban pynpait pynpra ïa ka jinglong kyrpang ka jongngi, khnang ba ka jait ka kynja jong ngi kan neh bad ka kmie,” ong u bah Sawkmie.
U Bah Sawkmie u la kren ïa kane ha ka sngi ba u ïa kynduh kyrpang bad ka Dorbar Shnong Mawiong rim ha kaba la ïa don lang ki dkhot ka committee shnong, ki longkmie bad ki samla.
U kyntu ïa ki paidbah ba horkit hordang kim dei ban ailad ïa kito kiba thmu ban wanrah ïa ka jingkulmar ha ka shongkha shongman ban ong ba kam pher, lada ki ai jaitkpa.“Katba ka District Council ka nangneh nangsah kaba long ka stieh ka jaidbynriew jong ngi, nga don ka jingkyrmen ba ka lawei ba phyrnai ka dang don,” u la pynkut.
