Ka long kumba ïuh tdongbseiñ ban tip ba kawei ka kynhun shongshit niam Hindu mynnin ka sngi Palei hapoh ka shatri “Gau Dhwaj Sthapana Bharat Yatra” ka la thmu ban khot ïa ka Press Conference ha office jong ka Shillong Press Club bad ban ïa ïaid paidbah ban ïalap ba dei ban burom ïa ka ‘Masi’ kum ka kmie ha ri India baroh kawei bad dei ban kiar shisyndon na ka jingpynïap bad bam dohmasi hapoh ka jingïalam jong uta u Jagat Guru Shankaracharya Shri Swami Swaroopanand Ji Maharaj.
Hynrei katei ka jingthmu jong kitei ki riew shongshit niam Hindu ka la shu pulom ei namar ka jingkloi jong ka Hynnïiewtrep Youth Council (HYC) ban leit tur sha Shillong Press Club ban pynpaw pyrshah halor katei ka jingthmu jong katei ka kynhun. Kumba, la ïai thoh ha ki column kiba mynshwa, ka jingthmu jong ka BJP lada ka lah ban ïoh majority ha Parliament da ¾ bynta, khlem pep ka thong jong ka, ka long ban pynurlong lut ïa ki agenda jong ka Rashtriya Swayamsewak Sangh (RSS), kata; ban pynlong Hindu state ïa ka ri India na khlieh ha kjat bad ban mane blei ïa ka masi kum ka kmie nalor kiwei pat. Hynrei donbok ba katei ka jingphohsniew kam shym la urlong satia, namar ba ki paidbah kim shym ai vote pura ïa ka BJP, ha kaba ka la nanghiar pynban na kaei kaba ka don ha kine shiphewsnem ba la lah. Ngi sakhi ïa kata kumno ba ki Chief minister jong ki ki trei, kum ka ‘flood jihad’ jong u Himanta Biswa Sarma pyrshah ïa u trai bad vice chancellor jong ka USTM Jorabat bad ka jingpynbna ban khanglad lut ïa ki Miya Muslim nalor kiwei pat ki ‘love jihad’.
Tangba ka jingwantur jong ki riewshitniam Hindu hangne kam lah ban long khlem da don ki trai muluk kiba la ïa kyrsum bad kiba pyrsat pyn rhem lang bad ki. Hato kita ki trai muluk kim tip ïa ka rukom bam doh jong ki briew hangne?. Ka jinglah ban theh umpjah noh ïa ka jingthmu ba rhem jong katei ka seng Hindu, ka la dei ban ai burom sha u Bah Roykupar Synrem, President ka HYC uba la kloi ban leh ïa kaba donkam. Don uwei u nongdro dur cartoon uba dro ïa ka samla college ban riam da ka dur masi, da kaba u thoh caption; lada ki khun kynthei jong ngi ki riam kumtei, ym don ba nud ban ktah ïa ki ha India’. Ka long kaba shisha, namar ba ki khar Muslim ki shah pynïap man la ka por ha ki jylla babun paid ki khar Hindu ha kita ki ‘cow vigilante’ bad ym don ba ai mukotduma pyrshah ïa ki, lada don iwei ar ruh, ka case ka la shu ïap la ïap kumto, namar ym don justice shuh. Hynrei kaei kaba sngewtynnad eh ka long, wat la kitei ki juh ki kynhun “Gau Dhwaj Sthapana Bharat Yatra” ki leit ïalap ban khang bam doh Masi ha Arunachal Pradesh, ka jylla ba synshar ka BJP bad ha Nagaland ba khlehkhaw lang, ka mih pynban ka jingpyrshah bajur na ki nongshong shnong, naba ki wan ban mushlia ïa ka rukom bam rukom dih (food habit) jong ki riewlum jong kane ka thaiñ shatei lam mihngi. Ha Nagaland ka Naga Students Federation ka la pyrshah tyngeh ïa ka jingthmu ban pynlong rally ha ka 28 tarik, mynta u bnai ha Kohima.
Ka NSF ka ong, ba katei ka jingleh ka dei ka jingthmu ban ïuhroit ïa ka hok, ka rukom im, rukom bam jong ki nongshong shnong kiba imsuk imsaiñ da ki spah pateng. Katei ka seng Naga ka da byrngem tyngeh ruh ba kan nym ailad ba kum katei ka jait jingkhang bamdoh kan jia ha khyndew jong ka Nagaland. Ka Nagaland Legislative Assembly ba ka sorkar jylla hi baroh kawei ka la rai ba ka “jingthmu ban khang bam doh Masi katkum ka aiñ “Ban on Cow Slaughter Act 2019” kam dei ban mushlia ïa ka special provision hapoh ka ka Article 371A, ka kdup ïa ka culture, Customs bad religious practice jong ki Naga (kynthup ïa ka bam ka dih jong ki).
Nangta, sa ka Sengkieng atiar NSCN/GPRN (Khango) ka la maham tyngeh ba katei ka seng Hindu kam bit satia ban mushlia ïa ka bam ka dih jong ki briew jong ka. Nangta, kaba sngewtynnad shuh shuh, ka long ba ka Unit jong ka BJP ha Phek District ryngkat bad ka state BJP ka la rai ban dkhat noh ka jingïadei bad katei ka seng lada ki wan ban ïalap khang bam doh Masi. Shuh shuh ka la ong, ha Nagaland, lada phi khot kmie ïa ka mrad, ka la dei lypa ka jingñiewpoh ïa ka kyrdan jong ka Kmie ha ka imlang sahlang jong ki Naga. (In Naga custom, equating our mothers to an animal is ourightly disrespectful and insulting to the honoured and revered position, mothers occupy in the family and the society).
Ha Meghalaya ki shongshitniam Hindu, ki la sdang ban pynpaw naduh ka parade ïa ki dkhot ka RSS shisien shisnem, sa ka leh mynleh ban ai burom ïa ki riewkhraw jong ngi kiba la isih lypa ïa ki khar Hindu ha ka jingim jong ki, kum u Tirot Singh, Kiang Nangbah bad kiwei; hangno phin shem ba ki ibang ïa kitei ki khar shongshit niam?. Ïa kane la leh da kata ka ABVP tang ban pynthame ïa ki samla pule jong kane Jylla ban khring sha ka Hindutva. Nangta, ki la pyrshang ban knieh sa ïa ka krem Mawjymbuiñ ha Mawsynram bad kiwei pat ki programme hynrei napoh don u khwai uba ishyrkhei, to husiar !.
Kam long kaba suk ïa ka RSS bad BJP ban pynkylla ïa ka Secular India sha ka Communal India. Ba u khar Hindu un pynbna ba ka Masi ka dei kata ka kmie jong ka ri, lane kum kata ka “Rashtramata” (Mother of the Nation), te khlem pep ka Thma poh-ïing kan klang. Kumno, phin khmihlynti ba ki riewlum kin pdiang ïa kawei na ki jingïalap kitei ki shongshitniam haba tang ban kynnoh ïa katei ka kyntien ruh ym nang, kaba da eh kaba kyllain jalebi haduh katta katta. Namarkata, ka ri bad ka Jaidbynriew jong ngi kam dei ban ailad ban pharia ïa ka, da ki buit sianti jong ki suri kup snieh langbrot, kiba shu riam dur bula lynter. Ngi dei ban pynneh pynsah ïa ka rukom bam rukom dih, ïa ka jingngeit Blei kaba laitluid, katkum ka Secular India. Ka doh Masi ha ki riewlum jong ngi, ka dei ka vitamin bah, haba ki thait ki jrem na ki lyngkha ki risai, na ka rep ka riang, ki dih syrwa “du kjet masei” ban ïohbor, rwai u Bah Skendrowell Syiemlieh.
