Ka ïew pyninam jong ka DCIC ka long ka rynsan ban kyntiew ia ki ‘riew don sap ha ki kam shna jingshna
Khliehriat rymphang 27: Ka ophis jong u General Manager, District Commerce & Industries Centre (DCIC), East Jaiñtia Hills District, hynnin ka sngi ka la jingpynlong ïa ka ïew pyni nam kaba yn pynlong ar sngi lynter, ka District Level Industrial Exhibition, ïa kane ka ïew pyni nam la pynlong ha Khliehriat East Parking Lot, ha kaba la wan ban plie da u Deputy Commissioner, East Jaiñtia Hills District, u A. Baranwal, IAS.
Haba kren kum u kongsan u Deputy Commissioner, u la ai ka jingkhublei kitbok kitrwiang ïa ka ophis jong u General Manager, District Commerce & Industries Centre (DCIC), Khliehriat kaba la lah ban lum ban lang ïa ki nongkhaiï kiba na ka thaiñ kaba long ka lad ka lynti ban pynpaw pyrthei ïa ki sap ki phong ba ki don, u kyntu ïa ka tnat bad kumjuh ruh ïa kito ki briew ba don sap ba ki dei ban shim khiah shuh shuh ban treishitom ban shna ïa ki tiar ki tar ban kyntiew ïa ka ïew ka hat jong ki bad ruh ban lah ban iatynjuh bor bad kiwei kiwei kiba na kiwei kiwei ki jylla.
U la ong ruh ba na ka liang ka sorkar ka ai ki jingkyrshan ban kyntiew ïa ki briew don sap ban ieng hala ki jong ki kjat, u la ai mynsiem bad pynshlur ruh ba ki dei ban da pyndonkam hok ïa ki jingai jingkyrshan kiba na ka sorkar ban dup lah ban pyniaid ïew ïa ki tiar ba ki shna.
U General Manager, District Commerce & Industries Centre (DCIC), East Jaiñtia Hills, u bah H.N Kharpuri, u la ong ba ka jingthmu jong kane ka prokram exhibition ne ka ïew pyni nam ka long ban plie lad bad ruh ban pynpaw pyrthei ïa ki tiar ki tar ba la shna da ki riew don sap bad kane ka dei ruh ka rynsan ba ki lah ban die ïa ki tiar ba ki shna hi bad ruh kane ka dei kata ka rynsan ba ki iakynduh lang, ha kaba ki riew don sap ki lah ruh ban ioh jingmut shuh shuh bad ioh ïa ki jingtip ha kaba iadei bad ka jingshna ïa ki tiar shna hi.
Kiba la ai jingkren ki kynthup ruh u Functional Managers, DCIC, u bah G. Pala bad u bah P. Suja, bad uwei na ki nongioh jingmyntoi na ka skim PMEGP, u bah Danosha Tlang.
Hadien ka jingialang u Deputy Commissioner lem bad ki heh sorkar ki la leit ban jngoh ïa ki 30 tylli ki stall kiba don ha katei ka ïew pyni nam.