Ka Iewduh ka dei kawei na ki jaka ïew ba kongsan tam ha Shillong bad ka dei ka jaka kaba ju khapngiah bha da ki paidbah man ka sngi namar la dap naduh ki ki nongwan ïew, ki nongdie dukan, haduh ki nongwan die ia ki mar ki mata na kylleng ki bynta jong ka rilum Khasi bad Jaiñtia kumjuh namar baroh ki shaniah ïa ka Iewduh kum kawei na ki jaka khaii bad ka ïew iadie ïathied kaba kongsan.
Hynrei, kawei na ki jingeh kaba la slem bha ha kane ka jaka ka dei ka jingshah kyntur pud noh ki lynti ïaid kjat ha jan baroh ki basa ba don ha ka ïew. Ki lynti ïaid kjat, ha ka jingshisha, ki dei ki jaka ba la pynbeit kyrpang na ka bynta ki paidbah ban ïaid. Hynrei ha Iewduh, ha kiba bun ki bynta, lah ban sakhi ba ki lynti ïaid ki la shah tap da ki mar ki mata, ki tiar die, ki jingtei ba shipor, bad kiwei pat ki jingdonkam jong ki dukan. Kane ka pynlong ïa ki paidbah ban ym lah shuh ban pyndonkam ïa ki lynti ïaid ha ka rukom kaba dei.
Kane ka dei ka jinglong kaba ym dei ban shim sting, namar ka lah ban wanrah ïa ka jingma kaba khraw ïa ka jingshngaiñ jong ki paidbah. Khamtam eh ki tymmen ki kro, ki khynnah, ki kynthei kiba bah khun, bad ki briew kiba don jingthut ha ka bor ïaid ki lah ban shah ktah jur lada kim lah ban pyndonkam ïa ki lynti ïaid kiba shngaiñ. Kawei pat kaba kham syier ka long haba ki lynti iaid kjat ki la khim bad rit noh wat ki nongleh kam sniew khamtam ki nongtuh bad nongkloh pla ki ioh lad bha namar ki leh kumba wan lymbub hynrei ki la ioh ban rong bak ia ka pla lane ia kip la pisa jong ki nongwan ïew.
Lada ki nongdie dukan ki kyntur pud noh ïa ki lynti ïaid kjat da kaba buh ïa ki mar ki mata jong ki, ka jingmut jong ka lynti ïaid paidbah ka duh noh. Ha kum kine ki khep ki bor synshar la ka long naduh ka Hima Mylliem, ka KHADC lane ka Sorkar Jylla ki dei ban don da ka rukom treikam kaba shai ba kaei kaba lah bad kaei kaba ym lah ban leh ha ki lynti ïaid kjat. Lada don ki jaka kiba lah ban pyndonkam da ki nongdie dukan, dei ban pynbeit ïa ki jaka bad ban pynshai ïa ki kyndon. Hynrei, lada ka lynti ka dei kaba la buh kyrpang na ka bynta ki paidbah, ym dei ban shah ïano iano ban pyndonkam ïa ka kum ka bynta jong ka dukan.
Ka jingpynbeit kam dei ruh ban long tang ha kawei ka sngi. Lada ka jingpynkhuid ïa ki lynti ïaid ka dei man ka sngi donkam ruh ban peitngor lane buddien ban pyntikna ba ki dukan kim dei shuh ban kyntur pud sha ki lynti iaid kjat. Kane ka donkam ka jingpynbeit kaba neh, ka jingpeitngor kaba man ka sngi bad ka jingpyntreikam ïa ki kyndon khlem da shah liang iano iano.
Lada don ki kyndon, dei ban pyntreikam ïa ki. Lada don ki jingpynbeit ne ki jingpynkynriah, dei ban pyntreikam ïa ki ha ka rukom kaba shai bad kaba ïahap. Ka aiñ kam dei ban long tang ka jingthoh ha ki kot, hynrei ka dei ban treikam ha ka jaka paidbah.
Ha kawei ka bynta ruh, ka jingpynbeit ïa kane ka jingeh kam dei tang ka kamram jong ki bor ba dei peit namar wat na ka liang ki nongdie dukan ruh ki dei ban sngewthuh ïa ka jingkitkhlieh jong ki. Ka jingïoh kamai ka dei ka bynta kaba kongsan jong ka jingim, hynrei ka dei ban ïaid ryngkat bad ka jingïada ïa ka hok jong kiwei pat.
Lada u nongdie dukan u buh ïa ki mar jong u ha lynti ïaid, u lah ban ïoh ka jaka kaba kham heh ban buhj ïa ki mar. Hynrei, ha kajuh ka por pat ki paidbah nongwan iew ki lah ban duh ïa ka jaka ban ïaid kylluid namar kane ka la pynkhim noh ia ka lynti iaid. Ha kum kine ki khep, ki nongdie dukan ki dei ban ïatreilang bad ki bor pynïaid ban wad ïa ki lad kiba biang khnang ba kan ym wanrah ka jingkhnium lane ka jingthnum na ki paidbah namar ka jingkhapngiah ki lynti iew.
Ka jingpynbeit ïa kum kine ki bynta kam dei ban wan lyngba ka jingïaleh hapdeng ki nongdie dukan bad ki bor pyniaid hynrei ka donkam ka jingïatreilang. Ki nongdie dukan ki dei ban ïoh ïa ka jaka kaba biang ban die katba ki paidbah ki dei ban ïoh ïa ki lynti ïaid kiba kylluid bad kiba shngaiñ.
Ki bor ba dei peit ryngkat bad kiwei ki tnat kiba dei peit ki dei ban shong ïakren bad baroh ki kynhun kiba don bynta. Dei ban ithuh ïa ki jaka ba donkam ban pyllait, ban pynbeit ïa ki jaka die, bad ban buh ki kyndon kiba lah ban pyntreikam. Ka jingpynbeit kaba don nongrim kan kham seisoh ban ïa ka jingpynkynriah kaba shipor.
