SHILLONG, Nailar 06: Ka Langsning FC bad ka Nongkseh SS&CC ki la ïasam mar shi point hadien ba ïakhaid mar 2-2 kol ha ka jingïalehkai kaba lai jong ka Group E ha ka lympung Durand Cup 2026, hynne ka janmiet sngi Palei ha madan JN Stadium, Polo.
Ka jingïalehkai kaba tyngeh jong ka Langsning FC ha ka kylla miet ka la pynlah ïa ka kynhun ba kan khie im biang wat hadien ba ka la shah thep haduh ar kol tang ha ka kylla step.
U Shano Tariang (29’) bad u Hardy Cliff Nongbri (38’) ki la thep na ka bynta ka Nongkseh, katba u Mebanshngain Kurkalang (48’) bad u Syed Ahmed (50’) ki la thep na ka bynta ka Langsning.
Ha ka jingïalehkai ka Langsning ka la pyrkhat ba ka la ïoh ban pynkhihjar ha ka minit kaba 19 lyngba u Syed Ahmed hynrei katei ka kol ka la shah kyntait noh namar ka offside.
Katei ka kol ba la shah kyntait ka long ka jingmyntoi ïa ka Nongkseh, ha kaba ym slem ka la ïoh ban lamkhmat lyngba ka kol jong u Shano Tariang (29’), hadien nangta u Hardy un pynjlan ïa ka kol lamkhmat da 2-0 ha ka minit kaba 38 shuwa ban jam sha ka por shongthait.
Ka Langsning ka la ïoh ban jubab tang katto katne minit mar ïa sdang ka kylla miet, lyngba ka kol jong u Mebanshngain (48’) bad nangta u Syed Ahmed (50’) u la pyndep ïa ka jingwanphai da kaba thep ïa ka kol kaba ar.
Ka jingïalehkai ha kane ka sngi Thohdieng, 07 tarik Nailar, kan long hapdeng ka SC Delhi pyrshah ïa ka Defenders FC (Group C), ha ka por 4: baje janmiet, ha Birsa Munda Football Stadium, Ranchi. nangta ka East Bengal FC pyrshah ïa ka South United FC (Group A), ha ka por 7: baje janmiet, ha Vivekananda Yuba Bharati Krirangan, Kolkata.
