Nongstoiñ, Lber 20: Ka Sixth Schedule ka dei ka thymmei jong ka Khasi Hills Autonomous District Council, kaba la pynkup bor kyrpang da ka sorkar India na ka bynta ka synshar khaddar jong ki jaitbynriew riewlum kiba rit paid kaba la ithuh kyrpang ruh da ka riti synshar ka ri.
Ha kaba ïadei bad ka jingdonkam ban pynbha shuh shuh ïa ka Schedule na ka bynta ban pynkhlaiñ bad pynkup bor shuh shuh ïa ka synshar khaddar lyngba ka Sechedule da kaba pynkup bor shuh shuh ïa ki Syiem, ki Sirdar, ki Lyngdoh, ki Wahadadar bad ki rangbah shnong, u bah K.P Pangñiang president rangbah ka Hill State People Democratic Party, u la ong ba ka jingdawa ban pynbha shuh shuh ïa ka Schedule ka dei ka thong kaba hakhmat eh jong ka party.
Ha kaba ïadei bad ka jingdawa ban pynbha shuh shuh ïa ka, ka party ka la dep phah bun tylli ki jingthoh sha ka sorkar India ban pynkynmaw halor katei ka mat jingdawa. Nalor kata u la ong ruh ba ka party haduh mynta ka dang ïai bteng ban dawa bad pynsngew sha ka sorkar India halor katei ka mat namar ba wat ka Schedule ka dei ka thymmei jong ka synshar khaddar. Hynrei ki dang don shibun ki mat kiba don ha ka Sechedule kiba ka sorkar India kam shym pat la pyntreikam ïa ki na ka bynta ka jingbha bad ka jingmyntoi jong ki paitbah nongshong shnong ha Khasi Pnar.
U bah Pangñiang u la ong ruh ba katkum ba la kdew ha ka Sixth Schedule, ka mat kaba kongsan eh ba ka HSPDP ka angnud bad ka ïai dawa na ka sorkar India, ba ka dei ban pynbha nyngkong eh ïa ka paragraph 12A (b) da kaba weng noh ïa ka kyntien ‘President’ bad ban bujli noh da ka kyntien Governor ha ka jaka jong ka.
Nalor kata u la ong ruh ba ka sorkar India ka dei ban pynkhlaiñ shuh shuh ïa ki District Council kumba la pynkup bor lyngba ka Sixth Sechedule jong ka riti synshar kat kum ka Article 244 (2) & 275(1).
U la bynrap shuh shuh ba katei ka Article 275(1) kaba don ha ka riti synshar ka ri ka kdew shai ba ka sorkar India ka dei ban pynbiang ïa ki fund kiba bun jait na ka bynta ki District Council.
Haba phai pat sha ki bynta kiba donkam bad kiba kongsan lada la tynsat noh da ka kyntien Governor ha ka jaka jong ka kyntien president, u bah Pangñiang u la ong ba ka jingdon jong ka kyntien president ha ka paragraph 12 A (b) ka pynduh bor ïa ki trai muluk ha kiba bun ki liang, khamtam eh halor ka jinglong trai halor ka khyndew ka shyiap, ki khlaw ki btap, ki marpoh khyndew bad kiwei kiwei.
Lada donkam ban trei ïa ki kam kum kaba tih maw, tih shyiap, tih dewïong, shalan dieng bad kiwei kiwei, hap ban da pan jingbit na ka sorkar India. Hynrei lada la weng noh ïa ka kyntien president bad la buh noh da ka kyntien Governor, ki aiñ jong ka sorkar India kin ym lah shuh ban treikam bad la long trai ha broh ki bynta, la ka dei ha kaba tih dewïong, pom dieng, tih maw, tih shyiap shalan dieng bad kiwei kiwei.
U la ong ba ki dang don shibun ki mat kiba kongsan kiba la kdew ha ka Sixth Schedule katkum ka riti synshar ka ri, kiba ka party kam pat sangeh ban dawa na ka sorkar India. Ka party ka dang ïai byddien na ka por sha ka por, khnang ba ka sorkar India kan pynurlong na ka bynta ka jingbha jong ka synshar khaddar.
