Jowai, Nailur, 07: Ka Jowai Diocese ka la rakhe ïa ka sngi burom jong ka Diocese ha ka sngi U Blei ha Parish Mynsngat.
Da ki hajar ngut ki paidriewngeit na ki Parish bapher bapher kata na Jowai, Amlarem, Phramer, Ladrymbai, Ladlakadong, Lumshnong, Umkiang, Khliehriat, Jalaphet, Sutnga, Mookyndeng, Barato, Namdong, Iongshiwiat, Ummulong bad Sahsniang Parish, ki la ïatuid sha Parish Mynsngat namarba ka dei ruh ka jingrakhe ïa ka Silver Jubilee jong ka Kynhun Balang Barit (KBB), ka Jubili ka Katholik Association Jowai Diocese bad ka Jubili jong ki Khynnah Shakri Duwan.
Ha kajuh ka ka sngi jia ryngkhat bad ka jingpynbna riewkhuid ka Balang ïa u Pier Giorgio Frassati bad ïa u Carlos Acutis ha Vatican da u Pope Leo XIV.
U . Bishop ka Jowai Diocese Most Rev. Ferdinand Dkhar u la long u kongsan ha baroh ki jinglehñiam.
Haba kren ha ka Mass Bakhuid, u ong ba ka Hima U Blei ka donkam ïa ki riew aitilut, ki ban aiti nadong shadong, ki ban klet ïalade bad ban ïm sngi ban pyndep ïala ka deiti bad ka jingklet ïalade ka dei ban ïalam sha ka jingshlur bad ban kloi ban leh ïa ki kam radbah ki ba bha na ka bynta ka Hima ka jong U Blei bad na ka bynta ka bha ka miat ki para-briew.
Ka Diocese Day ka dei ka sngi kaba kum ki riewngeit jong ka Diocese ki ïa kynduh lang kum kawei ka ïing ka sem bad haba phai sha ka Kynhun Balang Barit (KBB) jong ki Parish bapher bapher. U Bishop Ferdinand u kyntu ruh ïa ki paidabh u Blei ban pule bad im sngi ïa ka ktien ka jong U Blei naba ka ktien ka jong U Blei ka ai ïa ka mynsiem jingïaieid bad jingïatylli hapoh ka Balang kum shi-ïing shisem.
Haba phai sha ki Head Katekist, ki Rangbah Balang, ki Kmie Balang, ka Synjuk Seng Rangbah, ka Synjuk Kynthai Katholik bad sha ka Seng jong ki Samla ka Jowai Diocese Catholic Youth Movement (JDCYM), u Bishop u kyntu ïa ki ba kin long kum ki Apostol ban ïarap bad ban ai mynsiem ïa ki paidkhristan jong ka Balang ban long ki Khristan ki babha bad ban ïatylli kawei kumba u Jisu u khmihlynti bad u kwah ba ki nongbud jong u kin long ki radbah, kiba dap shynrang, kiba dap kynthei ym kiba rit mynsiem, ym kiba jemrngiew bad ym kiba khawpud na ka bynta ka bha ka miat ka Hima u Blei bad ha ka jingïadei para briew.
Haba phai sha ki dkhot ka Katholik Association bad sha baroh ki paidriewngeit, u ong “nga u Bishop, ki Lyngdoh, ki Brother, ki Sister ngin long kawei ha U Khrist bad ban long kiba kmen borabor ban long Katholik bad ban ïeid thoiñ thoiñ ïa ka Balang bad kiba kloi ban da ïa ka”.
U Bishop u pynkut ïa ka jingkren sneng kren kraw da kaba ong, “kane ka dei ka snem jubili bakhraw jong ka jingrakhe jingdap 2025 snem, ngi donkam ban ïa treilang ïa ïaidlang kum ki Pilgrim ha kane ka snem jubilee namar kata. Nga kyntu ïa baroh ban ïatylli lang bad ban ïa ïaidlang bad ka Balang Salonsar bad ban long ki riew aitilut ha ka ban pynheh pynïar ïa ka Hima ka jong U Blei bad ha ka bha ka miat ha ka longbriew manbriew kumba la saiñdur da u Blei Nongbuh Nongthaw.”
La synran lang ïa u Bishop Ferdinand da u Secretary BEC jong ka CEBI, na Mumbai u Fr. George Jacob uba la mihkhmat na ka bynta ka Catholic Bishop Conference of India (CBCI) ban sakhi lang ha kane ka sngi.
