Ka Guest House ha Shillong, ki nonghikai Garo, ka Shopping Complex na bynta ki Garo, dawa ka AKHAF

Shillong, Nailar 10: Ki nongïalam jong ka All Khasi Hills A•chik Federation (AKHAF) HQ, Shillong ha ka sngi Balang ki la leit ban aiti ïa ka dorkhas ha u Myntri Rangbah ka jylla u Conrad K Sangma ban kyrpad ba ka sorkar kan peit lem na bynta ka jingdonkam jong ki paid Garo kiba shong ba sah ha rilum Khasi.
Ka AKHAF ka la kyrpad ba ka sorkar kan thung da ki nonghikai Garo ha ki skul kiba ai jinghikai lyngba ka ktien Garo kiba don ha ki bynta ka rilum Khasi namar kiba bun na kum kine ki skul watla la ki dei kiba ka ktien Garo ka dei ka ktien ba ki ai jinghikai, katba kiba bun pat ki nonghikai kim dei satia ki Garo.
“Lada ha ki skul ba hikai lyngba ka ktien Garo ki nonghikai pat kim dei ki Garo kiba pnah ha ka ktien ka lah wan lam sha ka jingkulmar ha ka ktien bad kane ka lah ban ïalam syndon sha ka jingduh jait ka ktien Garo kumta ngi kyrpad ba ka sorkar kan peit khnang ïa kane ka bynta khnang ba kan long ka jingmyntoi ïa ki paid Garo” ong ka AKHA.
Ka AKHAF ka la ong ruh namar ka Shillong ka dei ka nongbah ka jylla kiba bun ki Garo kiba wan donkam tang na bynta khyndïat sngi ha Shillong kim don ki jaka sah bad ki hap ban sah ha ki Hotel shimet kiba rem dor.
Ka AKHAF ka kdew ba jin lada don da ki Guest House sorkar na bynta ki paid Garo kin jin ym da mad jingeh satia ïa ka jaka sah. Shuh shuh ka ong ruh ba da ki bun bun ngut ki Garo kiba wan trei bad pule ha Shillong ki hap sah ha ki ïingwai ba rem syllad ka dor, kane ka buh jingeh ïa ki Garo kiba wan na ki longïing ba duna ka ïoh ka kot. Na ka liang ka AKHAF ka la ai jingmut ba ka sorkar kan tei noh da ka Guest House na bynta ki paid Garo ha Shillong bad katba ka sorkar kam pat lah ban tei ïa ka ïing ba pura ka la ai jingmut ba ka sorkar kan shu wai noh shipor da kino kino ki ïing kum ka Guest House na bynta ki paid Garo.
Shuh shuh ka AKHAF ka la ai jingmut ba ka sorkar kan tei noh da ka mini-shopping Complex ha Shillong na bynta ki Garo ha Shillong kiba im ja na ka kam die jingdie ha madan namar kumba long mynta ki hap shah ïa ka jingther u slap bad ka jingshit ka sngi na ka daw ba kim ïoh jaka kaba biang ban die ïa ki mar ki mata jong ki.
Ka AKHAF ka la buh ruh ïa ka jingkyrpad ba u Myntri Rangbah ba ka surok kaba pynïasnoh ïa ka Mawpyllun ha South West khasi hills District bad Maheskola in South Garo Hills district kaba la jot haduh ba ym long ïaid kali shuh na ka jingpynjulor u slap bah ha ka 16 bad 17 tarik Jylliew 2022 ba u Myntri Rangbah un bthah ïa ka tnad ban pynbha noh biang ïa kne ka surok.