Shillong, Nailar, 10: Ka Sorkar Jylla ka la mang pisa T.16.92 klur na ka bynta ka kylla banyngkong ban ïarap ïa ki 6 hajar ngut ki nongri sniang hapoh ka jylla baroh kawei bad nalor kata ruh yn sam 24,000 tylli ki khun sniang ha ka jylla baroh kawei.
Ïa kane la pyntip da u Myntri Rangbah ka Jylla u Conrad Kongkal Sangma haba plie ïa ka Farm pynkha khun sniang ha ka shnong Rikwareng, Samanda, East Garo Hills ba la pyntreikam lyngba ka Rural Backyard Piggery Scheme.
U Myntri Rangbah u la ong ba ka Sorkar lyngba ki mission bapher bapher ka la ïarap kyrpang ïa ki nongrep bad ïa ki nongri jingri hapoh ka jylla.
U la ong ba ka Sorkar ha kine ki saw snem ba la leit noh ka la pynthikna ba ki nongshong shnong ha ki thaiñ nongkyndong kin kiew irat ha ka ïoh ka kot.
“Haduh 4.5 lak ki nongrep ha ka jylla ki donkam ïa ka jingïarap kaba katkum ka juk ba thymmai ban kyntiew ïa ka khih ka kamai jong ki lyngba ki prokram bapher bapher kiba ka Sorkar ka la wanrah,” ong u Conrad haba pyntip ruh lyngba ka Rural Backyard Piggery Scheme, haduh 6000 hajar ngut ki nongri sniang kin sa ïoh jingmyntoi na ka sorkar da ki khun sniang na ka bynta ka kamai kajih ka jong ki.
U Conrad u la ong hadien ba la ïoh ïa ka jingtip ba pura lyngba kane ka prokram, ka Sorkar kan sa pynjlan ïa kane ka prokram ban ai jingïarap shuh shuh sa 15,000 hajar ngut ki nongri sniang.
Shuh shuh u la ong ba ka Sorkar ka la buh thong ban mang pisa sa T. 25 klur na ka bynta ban pyntyllun ïa ka Rural Backyard Piggery Scheme, ka prokram ba la bei jingïarap pisa lang da ka Sorkar Jylla bad ka National Livestock Mission, ka Sorkar India.
Nalor ka Rural Backyard Piggery Mission, ïa mynta ka Sorkar ka la pyntreikam ïa ka skhim ri sniang kaba haduh T.109 klur ha ka jylla, la ïathuh u Myntri Rangbah.
U la ong lyngba ka skhim ri sniang, ka Sorkar Jylla kan sa wad lad ban tem ïa ka jingduna ka doh sniang ha kane ka jylla. U la ong ba ka Sorkar ka ju wanrah sniang ha poh ka jylla haduh T. 600 klur ha ka shi snem khnang ban pynbiang ïa ka jingbam doh jong ki paidbah ha ka jylla.
