Shillong, Jymmang 07: Ka Free Health Camp na ka bynta ki Rangbah kiba lah kot ïa ka 60 snem rta shajrong bad ki tymmen ki kro kiba dei ki nongshong shnong tang jong ka Dorbar Shnong Malki.
Kane ka long ka jingpyntip ba ka The Shillong Law College Red Cross Unit hapoh ka jingïalam jong ka, lem bad ka Indian Red Cross Society Meghalaya State Branch, Ka The Dr. H. Gordon Roberts Hospital, Shillong ryngkat bad ka Dorbar Shnong Malki kin pynlong ïa ka Free Health Camp kaba tang shi sngi ban rakhe ïa ka World Red Cross Day kum ka dak ban ïatylli ha ka long briew manbriew.
Kane ka prokram kan long ha u 9 tarik u bnai Jymmang (May) ha The Shillong Law College naduh ka por 10 baje mynstep haduh ka por 2 baje janmiet.
Ha kane ka Health Camp yn don ruh I Specialist jong ka Geriatric Medicine I ba don ha The Dr. H. Gordon Roberts Hospital, Shillong, Dr. Kitdor Diengngan M.B.B.S., MD Geriatric Medicine, Madras Medical College & National Centre of Ageing, Chennai I ba dei I ba nyngkong duh I Geriatrician ha jylla Meghalaya, I ba lah dep pyntbit ïalade ha ka ban ai jingsumar bad ïada na ki jingpang kiba ïadei bad ki tymmen ki kro.
Kumta lah wer sngewbha ïa baroh ki nongshong shnong jong ka Dorbar Shnong Malki tang ki ba lah dap 60 snem ka rta shajrong ba kin shim kabu ïa kane ka lad bad wan sha kane ka Health Camp, sngewbha rah ïa ki ID ha kane ka sngi kaba dei ka EPIC ne Aadhaar card.
