Halor ka Public Hearing ka M/S Shree Cement Ltd ha Lum Syrman, dawa pynsangeh ka PSM
Jowai, Jymmang 07: Ka Pnar Students’ Movement (PSM), Central Executive Committee kala leit ban buh ka jingujor ha u Deputy Commissioner East Jaiñtia Hills District, kumjuh sha ka MSPCB bad sha ka Secretary Executive Committee JHADC, halor ka jingthmu khot pynlong Public Hearing ka M/S Shree Cement Ltd ha Lum Syrman EJHD.
Ka Pnar Student Movement haka jingïalam u President u Embhah Passah mynta ka sngi kala leit aiti ïa katei ka jingthoh ban dawa pynsangeh mardor ïa ka Public Hearing kaba la khot da ka Meghalaya State Pollution Control Board (MSPCB) haka 22 tarik u Jymmang, 2026 na ka bynta ban tih mawshun ka kharkhana dewbilat M/S Shree Cement Ltd ha Lum Syrman haka jingheh kaba 217.394. hectare.
Shuh shuh ka seng kala ban jur ba ym dei ban ai NOC ïa katei ka Company Shree Cement Ltd kaba thmu ban leh da ka bor bad ïuhroit ïa =ka hok jong ki paidbah nongshong shnong ka thaiñ. Kumta ka seng kala dawa ban pynsangeh noh shi syndon ïa kane ka Public Hearing, khnang ban lait ka jingshah ktah jong ki nongrep, kumjuh ruh ïa ki um ki wah, ki dieng ki siej bad ki mrad ki mreng kiba im ha kitei ki jaka.
Ka seng kala pynsngew ka jingwan jong ki Factory Cement shapoh ka shnong ka thaw kiba don hapoh ka Ri-Lum Jaiñtia ki khlem wanrah jingmyntoi ei ei ïa ki paidbah babun ba lang, lada phai sha ka ïoh kam ïoh jam ki khun samla lane ha ka roi ka par bad bunsien ki kharkhana ki wan tang ban ïoh pynjot pynpra ïa ka mei mariang bad ka koit ka khiah jong ki paidbah nongshong shnong.
Ha kaba ïadei bad katei ka jingkhot Public Hearing ka seng ka ai jingkyrshan pura ïa ka jingpyrshah jong ki trai jaka bad ki nongrep kiba dang shañiah ïa ka kam rep na katei ka jaka, ka seng kala maham lada katei ka company M/S. Shree Cement Ltd ka leh da ka bor pyrshah ïaka hok jong ki para jaitbynriew, lane ki bor ba dei peit kim shim khia ïa kane ka kam ka seng kan wad ki lad ki lynti ban leit tied jingkhang shaduh ka ïing bishar High Court bad ujor syndon sha ka NGT, pynkut ka kyrwoh na u Publicity Secretary ka seng u samla S. Lakiang.