Ka elekshon ka la jan ki mih ki kynhun kiba kren ïa ki jingthmu lyngba ka niam: SAFF

Shillong, Lber, 01: Ka Shillong All Faiths Forum (SAFF) ha ka sngi Thohdieng ka la iakynduh kyrpang ha Archbishop’s House Laitumkhrah, Shillong ban iathir iatai hadien ba la mih ka jingkynnoh ba ka don ka jingbyrngem jong ki shitniam na ka Jylla Assam ban pynpra ia ki dur niam bad ia ki stashu ba la buh ha ki jaka pule ba la pyniaid da ki Balang Khristan ha ki shnong khapppud jong ka Jylla Meghalaya bad ka Jylla Assam ha ine ki khyndiat sngi ba ladep.
Kane ka kynhun ka la kyntu ïa ka Sorkar Meghalaya bad ïa ka Sorkar Assam ban shimkhia mardor halor kine ki jingjia kiba pyniaphiah bad kiba wanrah ïa ka jingiasih jaidbynriew ha ka kyrteng jong ka niam.
Ha ka sngi Palei ka Joint Action Committee (JAC) Umden Area ba kynthup ïa ka RBYDSO, RBYF, HYC, HITO, AMKA bad ka Synjuk ki Rangbah Shnong Marmaiñ Area ki la ujor sha u Deputy Commissioner ka Ribhoi District u Arpit Upadhyay halor ka jingbyrngem ban wah ne buh ïa ka dur Jisu ne kino kino ki dur kiba pynpaw ïa ka ñiam khristan ha Sacred Heart Secondary School, Marmaiñ, Ribhoi District kaba don ha hajan khappud ka Assam bad kumjuh ruh ki skul mishon ha kane ka thaiñ.
U President ka Forum u Most Revd. Dr. Purely Lyngdoh ha ka jingiakren bad ki lad pathai khubor hadien ba la wai ka jingialang u la iathuh ong, “ngi la iakren bad ngi la pynpaw ia ka jingsngewkhia halor ka saiñpyrthei kaba jia ha Assam, ha Meghalaya bad ha ka ri India baroh kawei. Ka ri India ka dei ka ri kaba kdup ia kiba bun ki jaitbynriew bad ki jait niam hynrei ha kine ki sngi, ka lyer jong ka jingkylla ki wan ki la mih na ki jingkren, na ki kam kiba ki leh ki bym itynnat shuh, kiba sngewsih bad kiba pyniapait iapra ia ki briew bad kane ka la wanrah ia kaei kaei ka bym itynnat shuh ha ka ri India jong ngi.”
“Ngi sngewsarong ia ka ri ba ka la nang kiew ha ki kam pynroi bapher bapher hynrei ha kawei ka liang ka jingiadei jong ki parabriew ki khate, ki pynhiardor noh ha ka ri India. Ka thaiñ Shatei Lammihngi ka dei ka thaiñ kaba ki hynñiew tylli ki jylla ki im hapdeng ka jingsuk jingsaiñ hapdeng ka jingsuk bad ka jingialong kawei. Hynrei mynta ngam lah ban ong ba ka la jan ka elekshon ne ba la wan ka lyer na kiwei kiwei ki bynta jong ka ri India ne ba ka elekshon ka la jan ki mih ki kynhun ki bym kren buhrieh hynrei kiba pynpaw beit ia kiei ki jingdawa, ki jingthmu jong ki lyngba ka niam,” ong u President ka SAFF.
“Kane ka long kaba sngewsih ka bym ju don ha ka jylla jong ngi hynrei mynta ngi ïohi ba ki la sdang ban wan kine ki jingkren ki jingdawa. Ka kynhun jong ngi ki nongialam niam bapher bapher ka SAFF ba kum ki nongshong shnong ha ka jylla Meghalaya ngi dei ban long kiba jaijai, ngi dei ban long kiba jynsur ka jingmut jingpyrkhat, ngim dei ban long kiba shongshit khlehbiej,” u la bynrap.
Haba kyntu ia ki paidbah ba kin long kiba husiar, u la ong, “ngi dei ban long kiba husiar. Ki khubor ki bym shisha kiba ngi ïohsngew nangne nangtai ngi dei ban long kiba husiar bad kiba peitngor bad ngin ialeh shitom katba ngi lah ba ngin ia im lang ha kane ka jylla. Ngi dei ban shim ia ki sienjam ba ngin pynsah ia ka jingsuk, ka jingsngewthuh jingmut bad ka jingialong kawei hapoh ka Meghalaya.”