Ka Elekshon bad ki samla ba dang ïoh vote nyngkong

0

Satang khyndiat bnai ka jylla Meghalaya kan sa hap ban pynthymmai biang ïa ki nongmihkhmat paidbah sha ka Iing Dorbar Thaw aiñ. Hadien san snem kata naduh u 2018, kiba bun ki khynnah ki la ia rangbah bad ruh ki la kynjoh sha ka 18 snem ka rta ba kin long kiba bit ban jied ïa la ki jong ki nongmihkhmat ne ban ïashimbynta ha kane ka bynta kaba kongsan eh jong ka jylla kaba dei ka ri synshar paidbah bad ban long kita ki nongshnong shnong kiba don ïa ka jingkitkhlieh khlem da pynleh nohei ïa la ki jong ki vote jong ki. Hynrei ka long ka bynta kaba kongsan bad kaba donkam katta katta ba ka dei ban don ka kynja jingai jinghikai ne ka jingpynsngewthuh paidbah bad kumno kine ki samla ba dang khie dang san kin sngewthuh ban pyndonkam hok ïa kata ka nongkynti jongki ban jied ïa ki nongmihkhmat kiba dei biang.
Hooid ki kmie ki kpa ki don ïa bynta ban noh synñiang sha la ki jong ki khun ki kti ha kaba iadei bad kumno ban jied ia ki nongmihkhmat, hynrei kumba ka long hi kan don beit ka jingsngew shah liang ban ong jied ïa ki kandidet kiba ma ki ki mon. Hynrei kumba ka dei ka hok jong iwei pa iwei ban pyntreikam ïa la ka jong ka mon ka long kaba donkam ba kin ïoh ïa ka jingpynshai paidbah ne jinghikai kumno ba kin nang ban pynshongdor ïa ki nongmihkhmat jong ki khnang ba ka jylla bad ka ri hi baroh kawei kan lah ban ïoh ïa kita ki nongmihkhmat kiba dei biang bad kiban long ka jingmyntoi naka bynta ka imlang sahlang bad ka jingkiew shaphrang ha baroh ki liang.
Ngim artatien ba kiba bun bah ki samla kiba dang ïoh ïa kabu ban iashimbynta ha ka jingjied ïa ki nongmihkhmat kin ym don lut ai ka jingshemphang lada ym don ban ïarap lem ïa ki. Kumta lada shu ieh kumto khlem ka jingbtin lynti ïa ki sha ka lawei kan long ka jingduh nong ïa ka jylla bad ka ri hi baroh kawei. Yn nai ïakren eh tang sha ki thain nongkyndong hynrei wat ha ki jaka sor hi kiba bun kim shemphang shaphang ka kam ban jied ïa ki nongmihkhmat. Hooid lehse ki samla kiba shim ki sobjek Political Sc ne Public Administration kin don khyndiat i jingshemphang halor ka synshar ka khadar bad ka sain hima sima, hynrei lehse kaei kaba ki la shah hikai kan ym pat biang ban kren sbiak shaphang ka rukom ban jied ïa ki nongmihkhmat kiba kumno!
Ka jingshim khia ban wanrah ïa ka jingpynsngewthuh paidbah sha ki samla kiba dang shu ïoh EPIC thymmai kan long ka jingmyntoi kaba khraw khamtam eh ïa ki nyngkong. Ki samla kin sngewthuh ba ka EPIC kam dei tang kata kaban ïarap ïa ki ban ïoh aplai Sim Card, ne ban plai Driving License ne ban ïoh plie Bank Account bad kiwei pat ki jingdonkam. Hynrei kin sngewthuh ba ka EPIC jong ki ka don ia ka jingthmu ba kongsan eh kata ban ai sha ki ïa ka hok ban jied ïa ki nongmihkhmat sha ka Iing Dorbar Thawaiñ jong ka jylla bad ka ri ruh kumjuh. Kane ka jingai jinghikai kan ïarap ruh wat ia kito ki bym ioh ban leit skul ban sngewthuh ïa kaei ka jingmut jong ka jingjied nongmihkhmat bad ka kam dei kata ka Card samoi ban shah thied tad ia ki vote jong ki.
Ka tnad sorkar khamtam ka Election Department ha ryngkat ka jingiatreilang bad ki Dorbar Shnong bad ruh ki Seng trei mon sngewtbha ki lah ban shim khia halor kane ka bynta kaba donkam shisha na ka bynta ka lawei. Ka por ka la sa khyndiat eh ban pynkhreh ïa ki jingdonkam ba dei biang halor kane ka bynta. Hynrei wat la katta ruh da ka jingïatreilang kyrmen ba kiei kiei ki jingthmu ba bha kin urlong bad wanrah ka jingmyntoi naka bynta baroh.
Lehse naka liang jong ka sorkar ka la leh ïa kiei kiei kiba donkam kumba la kren haneng, hynrei shuwa jong ka Election ka dei ka por kaba dei biang ban pynkynmaw pat sha baroh ïa ki bynta ba kongsan ba ïadei bad ka saiñ hima sima khnang ba ki samla ki ban leit ban iashimbynta kin da sngewthuh bad sngewhun ban jied ia kita ki nongmihkhmat jong ki bad ba kin tip ruh ba ki don ka bynta kaba khraw ha ka imlang sahlang bad ka jingshisha halor ka EPIC kaba ki bat.

Leave A Reply

Your email address will not be published.