Angnud ki paidbah Nongstoiñ ban ïohi noh sa ka College Sorkar

0

Nongstoiñ, Nailur 3: Ym tang kiba sah ha ki jaka sor, hynrei katkum ka jingïaid ka por, ki kmie ki kpa na kylleng ki bynta ka West Khasi Hills ki la nang sngew thuh ïa ka jingkordor jong ka pule puthi.
Haba ïakren bad kiba bun ki longkmie longkpa kiba don ïa ki khun kiba la pyndep ïa ka jingpule ha ki Secondary School, kiba don ruh ka jingthrang ban phah bteng ïa ki khun ha ka jingpule, hynrei namar ba ki dei kiba duk ki shem jingeh ban phah pule ïa ki khun ha sor Shillong, namar kim don ïing lajong bad ki hap ban shu sah wai ha ïing jong ki briew lem bad kiwei kiwei de ki jingeh.
U bah E.Wanñiang uwei na ki longkpa u la ong ba u don ki khun kiba dei ban leit bteng ïa ka jingpule ha ka Bachelor of Art, hynrei na ka daw ba ka jingduk um lah ban kyrshan bad u hap ban phah shong ïing noh. Uwei pat ki longkpa u ba don ar ngut ki khun kiba hap ban leit bteng ïa ka jingpule, u la ong ba tang namar ba ki khun ki kwah bad ki thrang ban bteng ïa ka jingpule, u la hap ban phah sha Shillong ryngkat da kaba phah shong ïing briew. U la ong ba wat ïa ka bai rung skul na ka bynta ar ngut ki khun u shem shitom, namar ka jingrem jong ka bai rung skul ka long shaba palat khamtam ha ki College kiba kham paw.
Kiba bun ki riew rangbah ki la ong ba haba phai ha ki jaka pule kiba don ha Khasi Jaiñtia ba kynthup ïa ki hynñiew tylli ki District, la jan baroh ki College ki dei kiba la pynïaid da ki kynhun Balang bad ki riew shimet bad lehse tang ka Shillong College ka dei kaba la pynïaid da ka sorkar. Ki la ong ruh ba haba peit pat ïa ka jingkiew sted jong ka jingdon ki samla kiba pass na ki Secondary School, katba nang mih ki snem ka nang kiew bad dei na katei ka daw ba ka bai rung ha ki College ba la pynïaid da ki kynhun Balang bad ki riew shimet ka rem bha.
Ki la ong ruh ba haba ïa nujor bad ka ri lum Garo kaba don tang saw tylli ki District ki College ba la pynïaid da ka sorkar ki don haduh lai tylli kwei ha Tura West Garo Hills, kawei ha Baghmara South Garo Hills bad kawei ha Willamnagar East Garo Hills. Haba ïa nujor pat ïa ka jingbun briew bad ka jingheh jong ka jaka, ka jingheh jong ka ri lum Garo ka long tang mar shiteng ïa ka rilum Khasi bad Jaiñtia.
Kumta ka por ka la dei ba ki bor ba dei peit ban wanrah noh ïa ka College sorkar ha kane ka District, khnang ba kan long ka jingkyrkhu bad ka jingmyntoi na ka bynta ki samla jong ka District hi baroh kawei.
Ka West Khasi Hills Distirct ka dei kaba la sahdien tam ha rilum Khasi bad lada ianujor bad kiwei kiwei ki district.
Ka jingbym phai khmat jong ka Sorkar Jylla sha kane ka District ka la pynlong ia kane ka thaiñ kaba don shaphang sepngi ban sahdien ha kiba bun ki liang.

Leave A Reply

Your email address will not be published.