Shillong, Jymmang 10 : U Working President ka UDP uba dei ruh u Myntri bad nongpathai khubor jongka sorkar MDA-2 u bah Paul Lyngdoh u la ong ba ka election MLA ha Sohiong Constituency kan ym ktah ïa ka jingïadei hapdeng ka UDP bad ka NPP kaba ïalam ïa ka sorkar MDA-2.
“ Em ngam ïohi ba kan don ka jingktah. Kane ka Election ka dei hi ban long bad kiwei ki constituency hynrei la hap ban pynsangeh noh shwa namar la jia kynsan ka jingkhlad noh u kyrtong ka UDP u bah H.R R Lyngdoh hynrei ka jingshisha ka long ba ngi la thaw ïa ka sorkar kaba dang dap ar bnai tam mynta kumta ngam i donkam ban pyndonkam ïa ka kyntien ktah ruh” ong u bah Paul haba kren ha ki lad pathai khubor.
U la ong shuh shuh “ Wat ha ka shongkha shongman ruh lehse lah ban mih ki jingïadait hadien 7 snem te hangne lei lei ka samoi ka long tang san snem te kumta ngam ïohi ban don jaka ïa kata ka jingïadait ïa pra”.
Haba la kylli halor ki jingkynthoh jong u nongïalam ka NPP uba dei u Symbud Myntri Rangbah u bah Prestone Tynsong ba ka lah ban don ka jingkylla ha ka sorkar, u bah Paul u la ong “ Halor kane un ( bah Prestone) lah ban jubab kham bha ma u nga tharai”.
Haba kren halor kane u bah Paul u la long ïa ka rai jong u paidbah ha ka election MLA 2023 dei ban burom namar ki la pynjop don burom ïa ka NPP haduh 26 ngut ki MLA bad na kata ka daw ka sa ïoh ban ïalam ïaka sorkar bad kumjuh ruh ki la pynjop ia ka UDP ruh 11 MLA kumta haba phi bishar ïa ka result phi hap ban bishar ha la ki bynta bynta. Namar na ri lum Garo ki paidbah ki la jied beit ia ka NPP bad na Khasi bad Jaintia ki la pynjop ïa ki seng riewlum bun eh ka UDP bad haba pynïasnoh lang iaki ar bynta ka sa mih ka MDA-2.
Haba la kylli ïa u bah Paul hato ka don ka jingpyrshang jongka NPP ban khot ïa ki MLA ka UDP ban pynïasoh pura sha ka NPP, u bah Paul u la jubab da kaba rymmuin bad ong “ Lada ki lah ban wan ïakren balei ngi ruh ngim lah ban ïakren bad ki ban ïasoh lang beit bad ka UDP balei ngin pynïasoh tang ma ngi?”.
U la ong shuh shuh “ Ngam don jingtip ei ei ruh ba don kum kata ka jingpyrshang. Lah ban kren bun kiei kiei na ki rynsan ïalap election khamtam haba don ka election tang ha kawei ka constituency kumta bun ki nongkren ki ban kren bun jait ki jingkren, mutdur ha kawei ka jingïalang ym duna ïa ki 20 ngut ki nongkren bad kumta kin mih beit ki nia kimba kumne kumtai tang ban khring ïa ki jingmut jingpyrkhat jong ki nongsngap bad ki lad pathai khubor ruh.
U la pynpaw ka jingsngew thikna ba ka UDP kanjop beit ïaka Sohiong. “ Ngi biang beit kum ka Party namar ha ka samoi kaba la dep ngi don tang 6 ngut ki MLA ha ïing Dorbar Thawaiñ hynrei mynta lada jop sa ka Sohiong ngin poi 12 ngut. Kaba mut ba ka don ka jingkiew da 50 % ki MLA kumta ngi sngew thikna tangba ïa ka rai u paidbah yn sa ïohi ha ka 13 tarik”.
Nalor kane u la ong ruh ba um patiaw satia halor ki khubor hamsaia kiba saphriang ba u lah ban shah weng noh na ka kynhun myntri hadien ka election ha Sohiong. “ Kiba bun ki briew ki lah ban kren har rukom hynri ngi don hangne ban shakri ïaki paidbah bad ïa ka jylla kumta ngam don jingpatiaw ei ei ruh halor ki khubor hamsaia” ong u bah Paul.
