Ka drama thaw sorkar haduh ka bhah thungkam – Ki jingjia ban pynsahkynmaw ha une u snem 2023

Shillong, Nohprah 29 : Ka Meghalaya ka la sakhi ïa ki jingjia kiba harukom ha une u snem 2023 baroh shi snem, kiba kynthup ym tang ïa ka jingïakhih hynrei khamtam eh ki jingjia kiba la pynkhihwin wat haduh ka saiñpyrthei.
Lah ruh ban kdew hangne ba dei ha ki sdang jong une u snem ba ka National People’s Party (NPP) ka la ïoh ban thaw ïa ka sorkar synrop ha ka 05tarik Lber hadien ba ka la ïoh bun eh ki MLA kiba jop ha ka elekshon MLA kaba long mynta u snem.
Kane ka party ka ïoh ïa ka jingkyrshan jong ka United Democratic Party (UDP), People’s Democratic Front (PDF) , Bharatiya Janata Party (BJP), Hill State People’s Democratic Party (HSPDP) bad ruh ki MLA shimet ha kaba ka jingbun paid ka la poi haduh 45 ngut. Kine ki kynthup ïa ka NPP kaba don 26 ngut, nangta ka UDP 11 ngut PDF – 2, BJP – 2, HSPDP – 2 bad MLA shimet – 2.
Ha kawei pat ka liang, kawei pat ka kynhun kaba thmu ban thaw ïa ka sorkar ban kyntait ïa ka NPP-BJP kam shym la seisoh hadien ba arngut ki MLA ka HSPDP ki la mih noh na ka jingïalang jong ki party riewlum kaba kynthup ïa ka UDP, VPP, PDF bad HSPDP ryngkat ka jingdonlang ka Congress bad NPP.
Ka drama sainpyrthei ka la nang shongshit hadien ar bnai, namar dei tang ha u Jymmang, ba ka PDF ka la khylliap lama bad baroh arngut ki MLA ki la leit ban pynïasoh noh sha ka NPP. Ka PDF ha katei ka por ka don arngut ki MLA ba kynthup ïa u Bah GAVIN Mylliem na Sohra bad u Bah Banteidor Lyngdoh na Mawkynrew. Kumta da ka jingwan pynïasoh jong ki, ka NPP ka la nang kiew sha ka 28 ngut na ka iing kaba don 60 ngut ki MLA. Katei kadei ruh ka jingkut jong ka PDF tang hadien hynriew snem ba la pynmih ïa ka.
Kawei pat ka phang kaba kham pynshongshit ha kane ka snem kadei ka bhah thungkam thungjam lane ka Job Reservation Policy ha kaba uwei nongïalam ka VPP ba dei ruh u MLA ka Nongkrem, Bah Ardent Miller Basaïawmoit u la leit ban pynlong daka jingshah thngan ba khlem buh por kaba la neh kumba 10 sngi tad haduh ba ka sorkar ka mynjur ban thaw ïa ka Expert Committee ban phai dien ba pule bniah biang ïa ka 1972 Job Reservation Policy. Katei ka jingshah thngan jong u ka la sdang naduh ka 23tarik u Jymmang.
Dei ha ka 25tarik u Nailar, ba ka sorkar jylla ka la mynjur ban thung ïa u Judge barim ka Madhya Pradesh High Court, u Justice (Retd) Mool Chand Garg kum u Chairman ka Expert Committee ban bishar bniah ïa kane ka Reservation Policy ha kaba la ai por 12 bnai ïa ka ban pyndep ïa kane ka kam.
Nangta, ka kylla kaba ar jong ka jingïakren pynbeit pud bad ka Assam, ka sorkar jylla ka la thaw biang ïa ki lai tylli ki Regional Committee ban bishar bniah ïa ka jinglong jingman jong ki hynriew tylli ki jaka ba dang sahteng ban pynbeit pud bad ba kin phah ïa ka kaiphod hapoh ki 45 sngi. Kitei ki jaka ki kynthup ïa ka Langpih ha West Khasi Hills District, nangta ka Borduar, Nongwah-Mawtamur, Deshdoomreah, Block-II ha Ri Bhoi District, bad ka Block- I, Psiar – Khanduli ha West Jaintia Hills District.
La ai por ruh ïa kitei ki lai Regional Committee ba kin phah ïa ka kaiphod jong ki hapoh ka 31tarik Nohprah.
Ka Jylla ha u Nailur mynta u snem ka la ïoh ruh ban pynbna paidbah ïa ka skim kyrpang na bynta ki paidbah ka jyla lyngba ka skim CM-Elevate Programme kyrpang na ka bynta ki nongseng kam la jong khnang ba kin lah ban kyntiew ïa ka ïoh ka kot bad khamtam eh ïa ki samla ka jylla ba kin lah ban ieng ha la ki jong ki kjat.
Katei ka prokram ka buh thong ruh na ka bynta ban ai kam ïa kumba 20,000 ngut ki riewshimet ba kain lah ban seng kam sengjam lajong ha kine ki lai snem ban wan ha ka jingmang ban pynlut kaba kot sha ka 300 klur tyngka.
Ha kawei pat ka liang, da ka thong ban pynkylla ïa ka pule puthi ha ka jylla, ka sorkar jylla ka la thaw ruh ïa ka State Education Commission (SEC) kaban peit ïa ka jingpynwan dur thymmai ia ka pule puthi ha baroh kawei ka jylla.
Kawei pat ka sienjam ha ka tnad pule puthi ba ka sorkar jylla ka shim kadie halor ka jingpdiang ban pyndonkam noh da ki kot pule jong ka National Council of Educational Research and Training (NCERT) da ka Meghalaya Board of School Education (MBoSE) naduh ka klas I haduh klas X naduh ka samoi ban wan.
Ha une u snem ka sorkar jylla ka la pynbna ruh da ka thma pyrshah ïa u drok ha kaba la pan ïa ka jingïatrei lang naduh ki nongïalam balang bad ki bor shnong lyngba ka DREAM Project.
Khatduh haba ïadei bad ka saiñpyrthei, kata shwa ka elekshon MP, ka NPP bad ka BJP ka la pynbna da ki nongïalam ba thymmai ha ka jylla, kata ka NPP ka la jied da u Bah Prestone Tynsong kum u President ka NPP Meghalaya bad ka BJP pat da u Rikman G Momin. Ha kajuh ka por ka NPP ka la pynbna da ka Dr. Ampareen Lyngdoh kum ka kyrtong MP na Shillong bad ka Agatha Sangma pat kum ka kyrtong na Tura Parliamentary seat.
Kiwei pat ki jingjia ki kynthup ïa ka jingpluh ding ba shyrkhei ha Khyndailad ha u Naiwieng kaba la pynlong ïa ka sorkar jylla ban pan haduh 44 klur tyngka na ka bynta ban pynkhlaiñ shuh shuh ïa ka tnad pynlip ding ha ka jylla.