Shillong, Nohprah 29 : Ka Hynniewtrep National Liberation Council (HNLC) ka la pynpaw ka jingpyrshah ïa ka jingthmu jong ka sorkar ban khang dam noh ïa ka Karkhana dewbilat Mawmluh Cherra Cement Limited (MCCL) bad ong ruh ba u MLA jong ka Sohra, u Bah Gavin M Mylliem ban shim ia ka jingkitkhlieh bad lada um shim ka jingkitkhlieh ruh udei ban iehnoh ïaka jinglong MLA lym kumta ka Seng kan leh eiei pyrshah ïa u.
Ka kyrwoh ba la phah da u Bah Saiñkupar Nongtraw, General Secretary jong ka Seng bad uba long ruh u Publicity Secretary, ha ka kyrwoh ba la phah mynta ka sngi, ka Seng ka tyrwa tuh ïa ki nonghrei jong kane ka Karkhana ban ïasoh noh bad ka HNLC ha kaba kan siew ka tulop kaba 25, 000 tyngka shi bnai, tang kan shah tang ïa kiba 45 snerm shapoh.
“Lad aka Sorkar ka jam sahkhmat bad ka jingkhangdam ia ka MCCL, kan bha shibun ia u MLA ka Sohra Gavin Mylliem ban shim ïa ka jingbahkhlieh”, la ong ka Kyrwoh ka ka Seng, da kaba ong ruh ba kumba ka sorkar ka shu tep im ïa ka MCCL, ki ingkhong shalyngmat ruh kidei ban ïoh ka jingpynsajia da ka jingiap.
Nalor kane, u Bah Sainkupar ula ong ba ka jingbyrngem jong ka Sorkar Jylla ban khangdam noh shisyndon ïa ka MCCL ka dei tang ka buit ban ailad ïa kiwei pat ki Kompeni dewbilat ba la long trai da ki bar jylla. “Ka sorkar ha ka jaka ba kan shimkhia ban pynkhie im biang ïa kane ka karkhana kaba nyngkong eh ha ka jylla bad long ruh ka lad aikam aijam ïa ki nong Sohra, ka thmju khangdam pynban ïa ka” la ong u Bah Saiñkupar.
Ka Seng kala pynrem jur ruh ïa kane ka jingthmu ba sniew jong ka Sorkar naba kan ieh khlem kam ïa ki nongshongshnong ka Sohra bad ieh ïa ki ha ka jingshimkabu ki khwan myntoi.
Lah ban kdew hangne ba dang shen ka sorkar jylla ka jingïalang jong ka kynhun Myntri ka la shim ïa ka rai ban khangdam noh ïa ka karkhna dewbilat ha Mawmluh bad rai ruh ban ai da ka golden handshake ïa ki nongtrei jong kane ka karkhana ba la seng naduh ka por jong ka sorkar Assam.
