Ka District Council kam don ka aiñ kynthiap seng, balei ban pyntip haba nga rung BJP: Bah Pius
Shillong, Risaw 15: U MLA bad MDC ka BJP u la pan jingshai na u Chief Executive Member (CEM) ka Khasi Hills Autonomous District Council (KHADC) hadien ba u la kynthoh ïa u ha ïing dorbar da ong u MLA ka BJP bad MDC ka UDP ba halor kano ka nongrim u ong ïa kine ki kyntien.
Haba ïa kren bad ki lad pathai khubor u Bah Pius Marwein u la pynrem jur ïa u Chairman Bah Strongpillar Kharjana bad ïa u Chief Executive Member (CEM) u Bah Winston Tony Lyngdoh ba la pyndonkam ïa ka kyntien MLA ka BJP bad MDC ka UDP ha ïing dorbar.
“U MDC ka BJP ba mih khmat ïa ka Langrin Constituency u la ong, ha District Council haduh mynta kam pat don ka 10 schedule ne ka aiñ ban khang ka kyntiap seng” ong u Bah Pius.
Shuh shuh u Bah Pius u la ong, “Lada ngi kwah ban leit sha kano kano ka party ruh ngi lah ban leit, te lada kwah kumta shna shwa da ka aiñ ngin sa pyntip na ka bynta ka jong phi hynrei haduh mynta nga dei MLA/MDC bad nga lah rung sha ka BJP nga lah dei u MDC ka BJP”.
Shuh shuh u Bah Pius u la ong, “Ta ka kyntien ba ki ïa kren tip ki ioh jingtip ne em hynrei lada phi peit ha ki por ba mynshwa hapoh council don ki MDC ba hapoh 5 snem ki ïa kynthih party jan man la u bnai ne man la u snem, te phi hap ban peit lang ïa ka jinglong ba hadien”.
Kumba long mynta ym donkam ban pyntip sha u Chairman ne CEM namar haduh mynta ym pat don ka aiñ ne kata ka 10 schedule bad tang hapoh ka District Council ngi dang lah ban leit, ong u Bah Pius.
Ha kawei ka liang pat ka liang u Bah Pius u la pynpaw ha ba kila rung sha ka BJP ki kyrmen ba kan iaid beit sha khmat.
Ha kaba iadei bad u Lamphang ka ïing dorbar thawaiñ ka jylla u Thomas A Sangma uba la pynpaw ba u dang bishar bniah ïa kane ka jingrung BJP ki MLA ka UDP u Bah Pius u la ong, Ngi lah leit mih tangba ngim pat ïakynduh bad u ha kato ka sngi ba ngi pyniasoh bad la air uh ïa ki kot ki sla bad ngi la leit ban pynkynmaw na ka bynta jong i te u la ong ai por bad ngi ngeit skhem ba in leh ia kaba bha tam.