Ha por ba ïatai nia ïa u Uranium jahrngai ki MDC Liang Pyrshah, don tang u Bah Titos bad Bah Ricky

Shillong, Risaw 15: Ha ka por ba u Bah Ricky Shullai, MDC na Laban-Mawprem u wanrah ïa ka Motion ban ïatai halor ka long ka man bad ka jingpyntreikam ïa ka Resolution ba la mynjur da ka Khasi Hills Autonomous District Council (KHADC) pyrshah ïa ka jingtih Uranium, ha ka sngi ba-ar ka dorbar tlang jong ka Council ha ka 15 tarik u Risaw, 2026, ki MDC ka Liang Pyrshah baroh ki la jah rngai na ka Ïing lait sa tang u Bah Ricky bad u Bah Titostarwell Chyne, MDC na Sohra bad Nongïalam ka Liang Ïatei.
Kum ban shu kdew ha ka Liang Pyrshah, ki don baroh 12 ngut ki MDC ba kynthup 5 ngut na ka NPP kata ka Kong Grace Mary Kharpuri, u Bah Sostheness Sohtun, u Bah Alvin Sawkmie, u Bah Lurshai Kharbani bad ka Kong Rona Khymdeit, nangta na ka UDP ba kynthup ïa u Bah Titostarwell Chyne, u Bah Barikupar Synrem bad u Bah Equator L Nongrang, nangta u Bah Synshar Kupar Roy Lyngdoh Thabah bad u Bah Pius Marwein, kiba dei ruh ha kajuh ka por ki MLA kiba la pynïasoh sha ka BJP, lem u Bah Srally Rashir bad u Bah Ricky Shullai.
Ïa kane ka mat ba la wanrah da u Bah Ricky u ba dei u MDC ka Laban Constituency la shim bynta ïatai ruh da u Bah Titos, nalor u Bah Shemborlang Rynjah, MDC na Laitkroh-Lyngkyrdem ha shwa ba u Bah Winston Tony Lyngdoh, Chief Executive Member un ai jubab.
Haba jubab u Bah Winston u la kren shai ba ka Executive Committee hi baroh kawei ka pyrshah ïa kano kano ka jingthmu ban khlong bad tih Uranium ha ki jaka ba hab hapoh ka jingpeit jingkhmih jong ka Council.