Ka dei ka jingkren kutlad, pynphai nia kylla u WP ka NPP ïa u MP ka Congress

Shillong, Naiwieng, 15: U Working President ka National People’s Party (NPP), Bah Hamletson Dohling u la ong ba ka jingkren jong u MP ka Congress na Tura u Saleng A Sangma pyrshah ïa ka jingwan pynïasoh NPP jong ki lai ngut ki MLA Congress, ka dei kaba la shu kren kutlad.
“Ka dei ka jingkren kutlad, kaba la shu kren madei mata khlem da thew da woh ban shu kynnoh ba ka don ka jingïadei bad ka pisa drok bad ka jingwan jong ki lai ngut ki MLA Congress sha ka NPP. U nongïalam ka Congress u la dei ban bishar bad tohkit shwa na la ka jong ka iing balei ba kine ki laingut ki hap ban phet lane ban mih noh na ka Congress,” ong u Bah Hamlet haba kren bad ki lad pathai khubor.
Shuh shuh u ong ruh ba ïa kum kitei ki jingkren khyllung khynnah na ka liang ka party ka pynrem jur bad kan ym lah lano lano ruh ban pdiang.
Shuh shuh u ong ruh ba kane ka lah ban dei ba ka don kano kano ka kam kaba ym lah shuh ban teh lakam hapoh ka Congress haduh ba ym lah shuh ban pynhun ïa ka jingdonkam ha ki constituency jong ki kaba pynlong ïa kine ki lai ngut ban wan pynïasoh sha ka NPP.
“Kam shym la don la don kano kano ka jingthong ïa ki hynrei ka dei hadien ba ki ïohi ïa jingtreikam bad ka jingdon ki nongïalam kiba kynsai ba ka NPP ka don kaba la pynskuin ba kin wan pynïasoh noh sha ka party,” bynrap biang u Bah Hamlet.
Haba pynshai shuh shuh halor ka jingkynnoh, u Bah Hamlet u la ong ba dei ka sorkar jylla kaba lamkhmat da ka NPP kaba ïakhun tyngeh ban khyrwit naphang haba ïadei bad u drok nalor kiwei kiwei ki jingsniew.
“Ban rat dyngkhong ïa u drok bad kiwei ki jingsniew donkam ka jingïatrei lang naduh ka sorkar jylla, ki nongïalam shnong, ki sengbhalang bad ki paidbah khlem da kdew kti ïano ïano ruh. Dei tang ka jingïatrei lang kaba lah ban rat dyngkhong ïa ka jingsniew. Ngi kwah ban kren shai ba ka party kan ym ailad ba une u jingdih ba sniew un kharoi ha ka jylla jongngi.
Ha kawei pat ka liang, u Working President ka party u ong ruh ba kum ki kmie ki kpa ki don ïa ka thong ban ym ailad satia ba ki kam sniew kin ïoh jaka bad dei na kane ka daw ki shim ka jingkitkhlieh ban wad ki lad ki lynti kumno ban ïakhun pyrshah khamtam ban khanglad ïa u drok ba un ïoh rung sha ka jylla.
“Kum ki briew ba don ka jingkitkhlieh ngi pang ka mynsiem haba ngi ïohi ïa ka jingbun ki samla kiba la ngop ha u drok. Hynrei kum ka party ba don ha ka sorkar ngin pyrshang lut ki lad ki lynti bad wanrah da ka DREAM Mission ban ïakhun pyrshah.”
Kumta, utei u heh ka NPP sa shisien u bynrap biang ba dei tang ka jingïatreilang kaba lah ban rat dyngkhong ïa ka jingshyrkhei u drok na kane ka jylla da kaba sangeh shwa ïa ka jingkdew kti bad kynthoh.