Ka dei ka jingïakhun Lai-dong, ong u heh Congress halor ka elekshon shiteng samoi ha Gambegre

Shillong, Naiwieng 16 : U Working President jong ka Congress, u Bah Pynshngaiñ N Syiem u la ong ba ka jingïakhun ïa ka elekshon shiteng samoi ha Gambegre kan long lai-dong, kata hapdeng u kyrtong ka Congress, kyrtong ka NPP bad ruh na ka TMC.
Kumban shu kdew hangne, ka Congress ka la sei da u Jingjang Marak ba dei u paralok jong u MP ba mynta ka Tura ba dei ruh u MLA barim ka Gambegre, u Saleng A Sangma, katba ka NPP kaba ïalam da ka sorkar, ka la sei da ka kurim jong u Myntri Rangbah ka Dr. Mehtab Chandee A Sangma, katba ka Trinamool Congress ka la pynïakhun da ka MDC kynthei ba marwei ha Garo Hills Autonomous District Council (GHADC) na Dengnakpara, ka Sadhiarani M. Sangma kaba dei ruh ka kurim jong u MLA barim ka Rangsakona.
“Katkum ka jingtip ba ngi ïoh, ka jingïakhun ha Gambegre ka dei hapdeng ka Congress, NPP bad ka TMC, bad lada jop mano-mano ruh, kiba jop kin ym tam bun than,” la ong utei u heh Congress.
Shuh shuh u la ong ba kane ka elekshon shiteng samoi ka kham pher namar don ki kyrtong kiba la dep ban aireng teng ha ki elekshon ba la dep bad don pat kiba dang mih ban aireng thymmai kumta ka eh bha namar khatduh ka shong hi ha ka jingïadei bad kdi paidbah.
“ Lada ïakhun hi u Saleng ka jingïapher kan don namar u la don jingïadei lypa bad ki paidbah, hynrei une u kyrtong ba mynta ruh u biang bad ka shong haduh katno ka jingïadei jong u bad ki paidbah”, u la ong.
Ka elekshon shiteng samoi kaba long ha Gambegre ka la dep ha ka 13 tarik mynta u bnai bad ka jingñiew ïa ki vote kan long ha ka 23 tarik mynta u Naiwieng. Ha kane ka elekshon ki don haduh 6 ngut ki kyrtong ba kynthup ar ngut ki kyrtong khlem seng.