Shillong, Lber, 26: U Bah Vincent H. Pala uba long u nongïalam jong ka seng Congress bad uba dei ruh u sitting MP ka Shillong Seat ha ka sngi Baar u la ong ba ka BJP kan ym jop palat ïa ka 200 Seat ha ka elekshon Lok Sabha ka ban sa long.
U la kynnoh, lada ka BJP ka ïoh 370 Seat, kan pynkylla ïa ka Riti Synshar jong ka ri da kaba weng noh ïa ka kyntien ‘secularism’ khnang ban pynurlong ïa ka jingphohsniew ban pynlong ri Hindu ïa ka India.
Ha ka jingïakren bad ki lad pathai khubor hadien ba ladep thep kyrteng, u Bah Pala u la ong, “kumba ka long mynta, ki (BJP) khlem pynbna ïa ka thup kyrteng basaw. Balei? Namarba bun ki jingïashrut hapoh ka party. Namarkata, ban ong ba kin jop palat 200 Seats ka long kum u dak jingkylli uba heh na ka bynta jong namarba kim don kyrtong ha ki jylla kum ha Meghalaya bad ha North East. Kumno phin khmihlynti ba kin jop? Ka dei tang ka buit ban pynbiej ïa ki paidbah.”
U la ong ba ka BJP ka ïoh 303 ngut ki MP ha ka elekshon ba ladep bad mynta ka kynti ka BJP kan hiar bha ha Maharashtra, Karnataka, Delhi, Bihar, Punjab, UP, Himachal Pradesh bad ha kiwei kiwei ki jylla. U la ong, “ha South India, palat 130 ngut ki MP bad mynta ka kynti, ka Congress kan ïoh kham bun ki Seat (na South).”
Haba pynpaw ba ka jingbuh thong jong ka BJP ban jop haduh 400 Seat ka dei tang ka jingpyrta ban ai dak ïa ki paidbah ka ri India, u Bah Pala u la ong, “ngi don 540 ngut ki MP. Ban pynkylla ïa ka riti synshar jong ka ri India ka BJP ka donkam 362 ngut haduh 370 ngut, na kata ka daw ki pynbna 370. Hato ki thmu aiu da kaba ong 370, 370 ki la aidak lypa ban maham ïa ki paidbah ka ri India lada ngi ïoh 370, kin pynkylla ïa ka riti synshar jong ka ri? Ka kyntien “secularism” kin weng na ka riti synshar jong ka ri India.
Lada la weng ïa ka kyntien “secularism” na ka riti synshar kan long kum ka Pakistan. Ka Pakistan ka dei ka ri Muslim, ka Bangladesh ka dei ka ri Muslim, ka Iran ka dei ka ri Muslim, ngin sa long kum ka Pakistan, kino kino kiba ngeit ha kiwei kiwei ki jait niam kan long beaiñ. Kane ka dei ka jingthmu jong ka jingpyrta 370-400. Ki tip ba kin ym ïoh hynrei ki shu kwah tang ban pynpaw pyrthei, kin leh beit ïa kane, kin pynkylla ïa ka India sha ka ri Hindu bad kane ka dei ka jingphohsniew jong ka BJP, la ong shuh shuh u Bah Pala.
“Nga la thikna ba bun na phi ki dei ki Hindu, bun na ki paralok jong ngi ki dei ki Hindu bad ngi kwah ai ka ri kaba shongsuk shongsaiñ, ngi kwah ïa ka ri kaba lait na ki jingshah thombor, ngi kwah ïa ka ri kaba lait na ki jingeh kumba la mad da ka Pakistan, Bangladesh bad kiwei kiwei,” u la bynrap.
Haba kynnoh ba ka jingïashrut hapoh ka BJP kan jur bha ha kane ka kynti u Bah Pala u la ong, “ki diaw mynsiem mynta ka kynti. Phi ïohi ba bun na ki MP ba la kham rangbah, ki shah pynduh tiket bad wat ïa kiba bun ki MLA ruh kim ailad satia. Lada phi peit ha Maharashtra, ha Madhya Pradesh bad Rajasthan, phin ïohi ba ïa ki nongïalam ba la rangbah ki la shah bret shabar, ki wanrah da ki nongïalam ba thymmai.”
Haba kynthoh ruh ïa u Myntri Rangbahduh ka ri u Narendra Modi u Bah Pala u la ong, “sa kawei pat kaba kham kongsan ka dei kaba jarjar, phi tip lada ngi tei ïa ka Ingmane, uno uno u rangbah niam u hap ban pynkyntang hynrei mynta u Myntri Rangbahduh ka ri India tang ban pynpaw pyrthei ïa ka Ram Mandir ha ka jaka ban ailad ïa ki Sadhu ba kin leh ïa ka kamram, ki politishian ki leh ïa ka kam jong ki. Ka jingthylli hapdeng ki Hindu, ka jingthylli hapdeng ka BJP bad kito ki briew kiba dei ban leh ïa ka kamram ka la nang ïa jngai. Ka BJP haba peit na ka liang ka niam, ki la leh bakla, na ka liang ka saiñpyrthei ki la leh bakla bad kin ym ïoh hi ruh wat 200 seat.”
Da kaba pynpaw ban dang jop na Shillong seat, u Bah Pala u la ïathuh ïa ki jingjop jong ka Congress ha ki 15 snem ba la leit noh. U la ong ba ki don bun ki jingdonkam ba dang dei ban leh khamtam ha Meghalaya kaba dang donkam ïa ka kad liengsuin ba thymmai.
“Ka Congress ka la lehbha ha ka liang ka pule ka puthi, ka jingpynïasoh ïa ki surok, ka khaii ka pateng, ka jingsam marbiang ïa ka ïoh ka kot. Ka polisi ba ka Congress ka la leh mynshwa, bad ka polisi jong ka sorkar ba mynta ki ïapher baklybak.
“Nga dei tang ma nga u MP, uba la shah pynwit ha ka BJP bad kiwei kiwei ki MP la ka long ha Assam, ha Arunachal Pradesh, bun kiba la leit noh ruh balei namarba ki la shah pynbiej ne shah byrngem, ki la phah tynruh ïa nga da ka ED, ka IT ruh kumjuh hynrei nga shaniah bad nga ieid ïa ki paidbah ka Meghalaya. Nga don mynta hangne na ka bynta ki paidbah bad ki paidbah hi kin shaniah bad kin ai vote ïa nga,” u la ong.
