Ka bamsap ka bampong kaba la pynlong ïaka jylla ban duk tasam bad hiran lut-Da u Abert Maring, Umdap Dumu. Ri-Bhoi District

Ka daw ka jing bamsap ka bampong kala pynlong ïaka jylla ban kylla duk bad hiran lut haka ioh ka kot hapoh ka jylla katba nangmih ki sngi, ha kaba katei ka jingbam sap kala don bad sdang naduh kiba heh haduh kiba rit.
Ka jingdawa bad ka jingpan bai sha (Commission) da ki briew kiba don haka bor, haba wan kino kino ki kam pynroi ne ki project bapher bapher sha ki paidbah la ki dei kiba bei tynga da ka sorkar jylla ne ka sorkar pdeng, ka jingtuh jinglute im im peit peit ïaka hok u duk u suk katba nangmih ki sngi kala nang jur bad ka bamsap ka bampong kala kylla long kum ka jingpang bampong (Cancer) ka bym lah shuh ban pynkoit.
Kane ka jingpang bamsap bampong kala long ruh kum ka jingpang ïabit ha kine ki sngi ha kaba ka jingtuh jinglute ïaka hok ki paidbah da ki briew kiba bat ïa u lakam synshar kiba don haka bor ba hakhlieh ruh (High Level) haduh kiba rit (Grass root Level) ka jur bha ha kine ki sngi bad ym lah ban len ba dei ka jingjur palat ka bamsap kala pynlong bun ki kam pynroi bad ki project bapher bapher ba kin shu jah rngai noh shiteng lynti bad sah khongreng kaba la pynlong pat ïaka jylla ban sahdien ha baroh ki liang.