Balei ki bor ba dei peit kim shim khia ban pynbha ïa ka surok NH-6 khamtam ha ka thaiñ Narpuh: KSU-EJHDU
Khliehriat naiwieng 15: Ka Khasi Students Union East Jaiñtia Hills District Unit ka pynpaw ka jingsngew lyngngoh bad sngew khia halor ka jingbym shim khia ki bor ba dei peit ban pynbha pynmiat ïa ka surok National Highway 6 ha East Jaiñtia Hills District khamtam ha baroh kawei ka thaiñ Narpuh.
“Hooid ym lah ban len ba ha sorbah Khliehriat kaba dei ka HQ jong ka District la dep ban maramot ïa ka surok bad ki paidbah ki la lait na u khyndew pum pum, hynrei haba phai pat sha thaiñ Narpuh, kata naduh Mynkre shaduh Malidor ka long ka jingjynjar khait ïa ki nongleit nongwan, ka surok ka dang long hi kum ka surok khyndew bad nalor kata nangjur nangjur ka jingsahkut kali bad ka surok ka la nangjur ar shah ka jingsniew” ong u kyrwoh na ka KSU East Jaiñtia Hills District.
La ong ba ka jingmaramot ïa ka surok ka don hi malu mala, ban shu peit ka la i long kamkai pynban namar ki nongtrei ki shu trei tang dep, ka jingtrei ka bym i iahap haei haei ruh bad ka jingpyntrei ruh ka suki palat “Ym lah shuh ban batai da ka ktien haduh katno ka jingsohsat ki paidbah naduh ki nongshong dukan, ki nongleit nongwan, ki ïng ki sem kiba don ha rud surok kiba la tap baroh da u khyndew pum pum uba la rung shaduh khiew ja, ki khynnah skul ba ïaid lynti na kane ka surok ruh ki la bam ïa ki khyndew pum pum, nalor kata ka aiom leh kmen Khristmas jong ki paid riewngeit Khristan ruh ka la dei ha une u bnai nohprah hato kumno kin leh kmen haba kat kane ka apot, kumno ki kmie ki kpa kin ialam ïa ki khun ki kti ban ïaid na surok sha ïing mane bad don ruh ki shnong kiba ki khynnah rit ki ju ïaid chrismas carol, imat ki bor ba halor ki hun ba ki khynnah rit kin ïaid ha u khyndew pum pum”.
La ong ba wat hadien ba ka seng ka la pynlong da ki jingiakhih, ka jingkhang tala ka ka jaka khrong khajna ka Toll Gate PlazaLumshnong bad kumjuh ki jingleit rung sha ki ophis sorkar la bun – bun sien, ka seng ka la dep pynsngew ruh shaduh u Symbud Myntri rangbah, u bah Prestone Tynsong, sha ka NHAI PIU, Shillong bad kumjuh ha ka jingïalang ha DC ophis ha Kliehriat, hynrei ka kam ka khlem poi shano shano ruh, kumta ka KSU mynta ka shim ïa ka rai ban ap haduh ban da kut une u bnai naiwieng 2023, kumba la pyllait ktien da u DC ka East Jaiñtia Hills District lyngba ki lad pathai khubor ba yn sdang ka jingsiang rong ïa ka surok haba kut une u bnai bad lada ki bor ba dei peit kim leh, ka seng kan sa shim ïa ka rai kaba tyngeh da kawei pat ka lynti, pynkut u kyrwoh.