Jyrwait shkor ka ïingbishar HC ïa ka sorkar bym biang ki tiar sumar jingpang bampong

0

Shillong, Naiwieng 16 : Ka ïing bishar High Court jongka jylla mynta ka sngi ka la jyrwait shkor ïa ka sorkar jylla namar kam biang ki tiar ki tar bad ki kor ki bor ban sumar ïa ka jingpang bam pong ( Cancer) hapoh ka jylla.
Haba bishar ïa ka mukotduma PIL halor kane, ka ïing bishar ka la pynpaw wat la ïa ka shnat la dep tei ha Civil Hospital, Shillong kaba don ruh tang khyndiat tylli ki jingthiah bad ïa kaba la pynkhreh ruh ban plie ha une u bnai ban wan hynrei ka paw pat ba ym don ki tiar ki tar ne ki kor ki bor ba biang ban sumar ïa katei ka jingpang bampong ba shyrkhei tam.
Ka jingpang bampong na shyntur, na pdot ka jur bha ha kane ka jylla bad ka kiew eh ha kane ka jylla lada ïa nujor ha ka ri baroh kawei namar ba la jur ka jingbam kwai bam duma palat, ka ïing bishar ka pynpaw ba ka jaka eksamin ba la buh da ka sorkar kam i long kaba biang ban lap kloi ïa kiba ïoh ïa ka jingpang, hynrei lada lap kloi ruh ka sorkar jylla kam lah ban leh ei ei namar kam don ki tiar ki tar bad ki kor ki bor ban ai jingsumar ïa ki paid nongshong shnong.
Ka ïing bishar ka la ong ruh ba ka sorkar jylla ka la dei ban ïateh soskular bad kiwei ki hospital ha kane ka thaiñ ne shabar kane ka thaiñ ruh kiba sumar ïa kane ka jingpang hynrei la i kumba kam don ka jingpyrkhat kaba kum kane ruh. Nalor kata kam don ka jingpyrshang na ka sorkar ban khot ïa ki hospital private ba kin seng ïa ki hospital ban sumar jingpang bampong ha ka jylla.
“ Lah ruh ban ai kawei lane ar ka jaka naka bynta ban wan ki hospital ki riew shimet ne ki kompani ba kin seng ïa ki hospital ban sumar ïa kane ka jingpang. Hynrei ka sorkar kam shym la shim khia halor kane ruh” ong ka ing bishar.
Haba bishar ïa ka jubab ba la ai da ka sorkar jylla ba ka shim khia ban ai jinghikai bad pynsngewthuh ïa ki paidbah ba kin sangeh noh ka bam kwai ka ïingbishar ka ong kane ka dei ka kam khllung, namar ka ïing bishar ka ong wat la phi leit pynshai katno katno ruh kam don jingmyntoi namar wat ïa u duma ba la ïai pynshai ruh kiba kohnguh ki long tang khyndiat eh. Kumta ha kaba kut hi kine ki prokram jingpynshai kim don jingmyntoi namar kim lah ban bujli ïaki tiar ki tar bad ki kor ki bor ai jingsumar.
Nalor kata ka ïing bishar ka la pynpaw ba ym i don ruh kano kano ka jingpyrshang na ka sorkar jylla ban pan jingïarap na ka sorkar pdeng halor kane ka kam namar la shu jubab ba ka don ka Cancer Research Institute. Hooid ka jingdawa ka bun na ka bynta ka koit ka khiah khamtam ka pisa ka tyngka. Ka sorkar ka lah ban duna ka jingïohlum khajna hynrei ka jingkhmih lynti ka long wat lada shim khia tang khyndiat ruh ka la biang wat la duna kata ka fund ruh.
Ka ïing bishar ka la ong ba ka shu kyntu ïaka sorkar jylla hynrei ka shong ha ki bor synshar bad kiba dei peit ban leh ïa kaba donkam. La ong ba wat hadien ba la ïai bud dien da ka ïing bishar mynta la hynriew snem ruh hynrei kam don ka jingkiew ne pynbiang ïa ki jaka sumar ha ka jylla. La ong ba wat tang ha ki PHC ruh dang bun ba ym pat lah ban thungkam ynnai da ïakren sha ki CHC ne ki hospital.
Kawei na ki daw ba la kdew na ka liang kiba ïasaid hakhmat ka ïing bishar ka long ba wat ki oxygen ruh ki duna ha baroh ki civil hospital ha ka jylla.
Nalor kata la pynpaw ba wat ha kito ki jaka ba sumar ne kha khyllung ruh ym ju don laiñ oxygen kaba donkam bha ban don lada hap ban ai oxygen ïa ki khyllung ba dang shu kha.
Ka ïing bishar kan shong bishar biang ha ka 6 tarik Rymphang 2023 halor kane ka PIL.

Leave A Reply

Your email address will not be published.