Jurip u Myntri Khynnah ka Sorkar Pdeng ïa ki project kam pynroi ha West Khasi Hills

Nongstoiñ, K’lyngkot, 12: Ha ka sien ba nyngkong eh u Myntri Khynnah ka Sorkar Pdeng uba khmih ïa ka kam tih dewïong bad kiwei kiwei ki marpoh khyndew u Satish Chandra Dubey da lade u la hiar sha West Khasi Hills naduh ka sngi Thohdieng ban leit jngoh ïa kiba bun ki projek kiba la pyntrei da ka jingbei pisa na ki skhim jong ka Sorkar Pdeng.
Ha ka sngi Thohdieng tang shu poi ha Nongstoiñ, u la lum lang ïa baroh ki ophisar jong ki tnad treikam bapher bapher ha ka jingïalang kaba la pynlong ha TRYSEM Hall ha ophis u Deputy Commissioner, ha kaba u la shim jingkheiñ ïa baroh ki skhim jong ka Sorkar Pdeng kiba la pyntreikam lyngba ki ophis bapher bapher ïa kiba la lah ban pyndep bad ruh ki bym pat lah ban pyndep, kiba ka jingpyntrei ka dang ïaid shait shait.
Ha ka sngi kaba bud pat u Myntri u la leit ban jurip ïa ka jingpyntrei ïa ka surok Two-Lane Nongstoiñ-Rambrai haduh Kyrshai. Ka surok Nongstoiñ sha Wahkaji. Ha ka jingleit jurip jong u ïa ka surok kaba la pyntrei da ka NHIDCL, la synran lang da ki ophisar jong ka tnad PWD bad baroh ki ophisar jong ki tnad trei kam ryngkat ki Majistor.
U Myntri u la leit jngoh ruh ïa ki ïingdorbar jong ki shnong kiba hap ha ka Nongspung Area Employmnet Council kaba la shna ha ka shnong Sohpian ha jinglut kaba kot T.20 lak bad kaba la bei pisa da ka Sorkar Pdeng lyngba ka Bharat Nirman Rajiv Gandhi Sewak Kendar (BNRGSK).
Ha ka jingleit jngoh ïa ka ïngdorbar la pynlong ïa ka jingïalang ba lyngkot ha kaba la pynïaid da u Sordar Shnong Bah Sirian Wahlang. Ha ka jingïalang u Myntri ka Sorkar Pdeng u la ai ka jingkren ha ka ktien Hindi ha kaba la pynkylla pat sha ka ktien Khasi da u BDO ka Nongstoiñ C&RD Block u Bah T.Diengngan.
Hadien ba la kut ka jingïalang u la leit sha ka shnong Sohwanthiang ban leit jngoh ïa ka dam kaba pynpoi umbam umdih sha kiba bun tylli ki shnong bad ruh shaduh ki lyngkha rep. Hynrei na ka jingbym don ka surok um shym lah satia ban poi sha ka jaka ba la shna ïa ka dam.
U Myntri u la leit ruh sha ka shnong Tiehsaw ban peit ïa ka rukom pynpoi umbam umdih sha ki ïing ki sem kiba la pyntrei lyngba ka Jaal Jeevan Mission (JJM). U Myntri u la leit ruh ban ïakynduh ïa ki nongshong shnong jong ka Mawphanlur, kaba dei ka jaka jngohkai kaba paw bha bad kaba itynnad tam ha West Khasi Hills. Ha kane ka shnong u Myntri u la ïohlad ban sngap ïa ki jingeh ba ki paitbah ki ïakynduh ïa kiba u Sordar jong katei ka shnong u la pynsngew ha u.
U nongaiktien jong u Myntri Khynnah ka Sorkar Pdeng haba ïakren bad u nongthoh khubor ha kane ka jaka, u la ong ba u sngew tynnad haduh katta katta ban poi ha West Khasi Hills namarba ki nongshong shnong ki long kiba donakor bad kiba nang ban burom ïa ki para briew.
Haba kylli pat ha kaba ïadei bad ka jingpyntrei ïa ki kam pynroi kiba la pyntrei hapoh ka District, u la ong ba ki don shibun ki projek ba ïa ka jingpyntrei la pyndep da kaba bud ryntih katkum ki kyndon ba la bthah da ka Sorkar. Hynrei ki don ki projek kiba ka jingpyntrei kam pat dep hynrei ka dang ïaid shaid shaid. Ha kaba ïadei bad kiwei pat ki bynta, u la ong ba ka shong ha ka Sorkar Pdeng ba kan leh ïa kaba donkam.
ïa u Satish Chandra Dubey la pdiang sngewbha da ki bor synshar distrik, kata, da ki ADC ba kynthup ïa u Bah H.K.Thabah, Bah V.C. Swer, bad Bah S. Marweiñ, u BDO Bah T. Diengngan BDO bad kiwei ki heh ophisar ka Sorkar Jylla.