Jurip ka HANM ïa ka surok Bilarhari sha Mawdongki, dawa ban siang rong noh

Nongpoh, Jylliew 28: Ki nongïalam ka HANM Western Ri Bhoi ha ka jingïalam u President, Sumarlang Lyngdoh ryngkat ki dkhot mynta ka sngi ki la leit ban jurip ïa kawei ka surok khappud ha Jirang Constituency kaba dei halor ka jingsngewkhia jong ka jingshah ktah ki paidbah na ka daw ka jingsniew palat katei surok.
Kane ka surok ba la leit jurip da ka seng HANM Western Ri Bhoi ka dei ka surok ba pynïasoh na Bilahari sha Mawdongki, kaba dei ka surok khappud hapoh ka Jirang Constituency.
Kumba la pynpaw da kitei ki nongïalam ka daw kaba ki la leit ban jurip ïa kane ka surok ka dei namar ba ki paidbah ki la mad jingeh ha ka leit ka wan na ka daw ka jingsniew palat ka surok khamtam ha kane ka aiom slap la shem jingeh ban ïaid ym ki kali ki motor hynrei wat ban ïaid briew na ka jingktieh bad jingthliew jongka surok.
Na ka liang ki nongïalam ka seng ki la kyrpad ïa ka sorkar MDA 0.2 ba kan phai khmat lem ban mang tyngka na ka bynta ban siangrong noh ïa katei ka surok bad ha kajuh ka por ka la kyrpad ruh ïa u MLA ka Jirang Constituency ba un shim khia ban ïa kren sha ka sorkar khnang ban ioh noh da ka sirok rong ban suk ki paidbah ha ka leit ka wan bad ban wan shibun ki kam pynroi haba la bit la biang ka surok paidbah.