Mawkyrwat, ‘Nailar, 17: Ka Federation of Khasi Jaiñtia & Garo People’s (FKJGP) jong ka South East Khasi Border Circle ki la hiar jurip ïa ka jingtwa jong ka surok ha Mawsynram bad ka jingïap jong u nongñiah.
Namarkata, ka seng hapoh ka jingïalam u President ka Circle, u samla Kyrmen Shangdiar u la kyntu ïa ka PWD Department bad ïa ki nongtrei ka department naduh ki overseer, muster roll ban shimkhia ban buh noh da ki kynja signboard ha ki jaka bym shong skhem bad u la kyntu ruh ïa ka sorkar bym dei ban shiliang haba wanrah ïa ki kam pynroi ha ka jylla namar ba ïa ka Mawsynram la shu ieh shrah khamtam ïa ka lynti synkien ka kyntu ba ka sorkar ka dei ban leh mardor ban jurip ban shna pynbha ïa ka surok naduh Mawphlang haduh Balat – Dangar.
U Kyrmen Shangdiar u la pynpaw da kaba ong ba ka sorkar kam dei ka sorkar jong kano kano ka party hynrei ka dei ka jong u paidbah ha ka jylla baroh kawei, kumta ka dei ban long ka sorkar kaba peit ïa ka bha ka miat ka roi ka par jong ka jylla ym tang ha ki jaka ne ki konstitwensi jong ki nongmihkhmat ba don ha ka jingshynshar hynrei ka dei ban peit salonsar khlem da leh shiliang khmat ban wanrah ïa ka roi ka par.
Ka seng lyngba u President ka phah ïa ka khubor sngewlem sha ki bahaïing kiba mad ïa kane ka jingjia bad ka seng ka pynpaw ka ai khublei ïa ka tnat PWD (R) Mawsynram Division, ka Mawsynram Police Station kyrpang ïa ka Dorbar Shnong Mawsynram kiba la ïaleh shitom ban ïarap lem ha kane ka jingjia khamtam ban pynïoh ïa ka met ïap jong u nongñiah ïa ka trok.
