Jur ka jingshah ñiew shilliang ïa ki paidbah Nongstoiñ ha ki san snem: Polestar Nongsiej
Kular u kyrtong UDP ban ïarap kyrpang na ka bynta ki nongrep
![](https://mawphor.com/wp-content/uploads/2023/02/polestar.jpg)
Nongstoiñ, Rymphang 01: U Bah Polestar Nongsiej kyrtong UDP jong ka Nongstoiñ haba ai jingkren ha ka sngi balang ha Umyiap, u la ong ba ka kumba 80% na ki nongshong shnong katei ka thaiñ ki dei kiba im ha ka rep ka riang bad katei ka pyntha ka dei kaba paka tam ban rep bad baroh shisnem lynter ki jingthung jingtep ki long beit.
Hynrei, ki paitbah ki ïakynduh shibun ki jingeh namar ka sorkar kam shym la thaw ïa ki policy kumno ban kyntiew ïa ka rep ka riang hynrei ki la bun kam tang ha kaba shna ïa ki aiñ ki bym ïahap bad ki paitbah. U la ong ruh ba kum u samla rangbah um lah ban shu peit kai ïa ka jingjynjar jong ki paitbah hapoh ka constituency bad ha ka district baroh kawei.
Kumta um banse ban shim ïa karai ban ïaleh ïa ka elekshon ha kane ka kynti bad wat la ka dang dei ka sien ba nynngkong ruh, pynban lada ki paitbah ki ai ka jingkyrshan ba pura ban pynjop ïa u bad lada ka UDP kan ïoh ban ïalam ïa ka sorkar, un ïaleh katba lah ban pynsngew sha ka sorkar ba kan thaw ki policy na ka bynta ban kyntiew ïa ki nongrep bad ban pynkhlaiñ ïa ka ïew ka hat na ka bynta ki mar rep, khnang ba ki paitbah nongrep kin kiew ha ka ïoh ka kot ka kamai kajih.
U la ong ruh ba ki dang don shibun bah ki shnong hapoh ka constituency kiba wat tang ka surok ruh kim pat don, ki skul ki dang duna bha bad ka jingduk jingkyrduh ka ban ïa ki nongshong shnong, hynrei ki hap ban shah shitom sah namar ym don ba phaikhmat sha ki.
Nalorkata u la ong ruh ba kawei pat ka jingangnud jong u ka long ban kyntiew ïa ki samla ha ki kam ïalehkai sport khamtam eh ha ka phutbol. Nangta ban thaw ki lad ba ki samla kin lah ban seng kam seng jam la ka long ha ki kam shna jingshna, ki karkhana rit bad kiwei kiwei ki lad ba ki lah ban ïeng hala ki kjat.
U la ong ruh ba lada u jop un wanrah ïa ka jingtreikam kaba khuid ba suba hapoh ka district khlem da ñew shilliang ïano ïano la u duk ne u riewspah ki dei ban long mar kajuh, la ki dei ki nongkyrshan ne kim dei kin long mar kajuh.
U la ong ba ha ki san snem u la ïoh sngew da la ki jong ki shkor, ba ki paitbah ki ud ki nam ba ka ka jingñiew shilliang ka jur haduh katta katta. Katei ka jingud ki paitbah ka la ktah bha ïa ka jingmut jingpyrkhat jong u bad u don ïa ka thong ba lada un jop, un pynduh pyndam shisyndon ïa katei ka jinglong namar ka dei kaba sniew haduh katta katta.