Nongstoiñ, Jymmang 12: Ka District Magistrate Eastern West Khasi Hills District Mairang, ka la pynjari da ka kyndon aiñ kaba 163 BNSS, 2023 ban khang pyrshah ïa ka jingkhlong shyiap na ka wah Khri bad wah Kynshi.
Ïa kane ka aiñ la pynjari hadien ka jingdon ki katto katne kiba ju khlong shyïap na ki bynta jong ka wah Khri bad Kynshi, khlem da ïoh jingbit na ki bor ba dei khmih kum na ka Ministry of Environment bad Forests jong ka sorkar India, lane na ka Environment Impact Assessment Authority jong ka sorkar jylla ne jong ka district.
Kane ka jingkhlong shyiap ha ki wah kaba khlem da ai jingbit, ka long beaiñ bad ka long kum ka jingpynkheiñ ïa ka hukum ba la pynmih da ka Hon’ble National Green Tribunal 2013 bad ruh jong ka Meghalaya Minerals Concession Rules, 2016.
Ka jingkhlong shyiap ha ki wah ka buh jingma ruh ïa ki jingthaw ba im ha um kum ki dohkha, ka pynthud ïa ka jingtuid jong ka um, ka pynjot ïa ki khlaw kiba don ha shilynter ki rud wah bad khamtam eh ka wanrah ïa ka jingtwa ki rud wah bad ka jingpynjot ïa ka mariang.
Lada lap ïa kino kino kiba pynkheiñ bad ïaleh pyrshah ïa kane ka hukum, kin shah pynshitom katkum ki kyndon aiñ 223 BNS Act 2023 bad kiwei kiwei kyndon kum ka Mines and Minerals (Development and Regulation) Act, 1957, ka Environment (Protection) Act, 1986, ka Air (Prevention and control of Pollution) Act, 1981, Water (Prevention and Control of Pollution) Act, 1974 bad NGT Order.
Lada don kino kino kiba bym sngew ïahap jingmut halor kane ka kyndon aiñ, ki lah ban leit mih sha ki bor ba dei khmih.
