Shillong, Ïaïong 24: Ka khubor ba la ïoh na ki pulit la ïathuh ba u Anshit Kakkar u la phah ka jingujor ba hapdeng ka mied jong ka 17 & 18 mynta u bnai, 2025, kawei ka kali ka bym lah ban tip ka la leit tynrah ïa uwei u post ha Bishop Cotton Road, Shillong bad ka la phet krad na kane ka jaka ha kaba kane ka la pynjulor ïa utei u post bad ïa ki tiar jong ka CCTV. Ka jinglut jong kane ka jingjulor ka la kot sha ka T. 98,000/-.
Ha kawei pat ka jingjia ki pulit ki la ïathuh ba u Bah Krillin Lyngdoh u la phah ka jingujor ba ha ka 19 tarik mynta u bnai ha ka por 10.25 baje mynstep, uwei u nongshong shnong ka Mawkyrwat (SWKH), u la tuh ïa ka mobile phone jong u napoh ka dukan kaba hapoh ka ïew Mawkyrwat (SWKH).
Shuh shuh ha kawei pat ka jingjia ki pulit ki la ïathuh ba ka kong Mel Dkhar ka la phah ka jingujor ba ha ka 17 tarik mynta u bnai ha ka por kumba 10.30 baje mynmied u khun jong ka uba kyrteng u Loris Dkhar ba la 33 snem ka rta u la thombor bad mait ïa u kurim jong ka u Bah Tngen Phawa da ka wait hapoh ka ïingsah jong ki kaba ha ka shnong Mupyut (WJH). Ha kane ka jingjia utei u lanot u la mynsaw jur bad la pynkitnoh sha PHC Jaraiñ ha kaba nangtei pat la pynkit noh sha CH Ïalong. Ha kawei pat ka liang ha ka 21 tarik mynta u bnai, ka kurim jong u bad kiba haïing ki la rah noh ïa utei u lanot sha la ka ïingsah jong ka para kaba ha katei hi ka shnong ha kaba u la khlad noh ha ka 22 tarik mynta u bnai, 2025. Halor kane ka jingjia ki pulit ki la kem noh ïa utei uba la shah kynnoh donkti ha kane ka kam.
