Nongstoiñ, Rymphang, 01: Ka jingthang pathar ïa ki khlaw ki btap ha West Khasi Hills, ka dei kawei na ki jingmlien ba ki paidbah haduh mynta, kim pat sngewthuh ba katei ka dei ka kam kaba sniew bad kaba ktah haduh katta katta ïa ka mariang. Kaba lyngngoh ka long ba kane ka jingthang pathar, kam shym la long tang ha ki jaka kyndong, hynrei wat ha jaka sor ruh kum ha Nongstoiñ kumba la sakhi ha kine ki sngi.
Katei ka jingthang pathar ïa ki khlaw ki btap, ki lum bad ki law bniap, ka wanrah ïa ka jingma kaba khraw, namar ha ki por ba la ryngkhiang bha ka mariang, ka thylliej ding ka lah ban pur sha ki shnong ki thaw bad ki ïing ki sem, ki lah ban ing khamtam eh ha ki nongkyndong.
Naduh u bnai Nohprah haduh ki taiew ba ar u bnai Jymmang, kiba bun ki nongshong shnong ha ki jaka kyndong kim ju don ha shnong, hynrei ki don ha ki jaka ba ki leit trei leit ktah bad leit bylla bad shong ki lah ban don tang ka kmie bad ki khun rit. Kumta ka long ka jingma kaba khraw wat ïa ki mynsiem briew khamtam ki khunlung khynnah.
Nalorkata ka jingthang pathar ïa ki lum bad ki khlaw, ka dei ka daw ba kongsan kaba pynduh jait ïa ki jingthung ba lai phew jait, kiba long ki dawai kynbat kiba kongsan ban pyndon-kam ha kaba sumar ïa ki briew haba ki jingpang ki shitom. Nangta wat ki jingthaw ba im kiba itynnad ruh ki duh jait lut, namar kim lah ban shah thang ha ka ding bad ka tdem.
Katto katne ki riew rangbah napoh ka District ba kynthup ïa u bah D.Tynhiang, bah P.Marweiñ haba ïakren ba u nongthoh khubor, ki la ong ba ka la donkam ïa ki Nongsynshar shnong, ki nongsynshar hima bad khamtam eh ïa ki bor sorkar, ba kin thaw da ki aiñ kiba pyrkhing ban ban pynshitom tyngeh lada lap ïa ki ba pynkheiñ.
Ki la ong ba ka por ka la donkam ruh ba ki dorbar shnong ryngkat ki tnad sorkar, ba kin pynlong ïa ki kynja awareness prokram na ka bynta ban pynsngew-thuh ïa ki paidbah, ba kin kiar na katei ka jingmlien ba sniew.
Ym lah ban len ïa ka jingshisha ba man la u snem, lada ïaid kylleng ki jaka ha West Khasi Hills naduh u bnai Nohprah haduh bnai Lber, ki lum bad ki khlaw ki btap ki la ingkhong bad kylla dpei na kane ka daw. Halor kane ka jingwiang ding pathar, don na ki nongshong shnong kiba shu kubur ba ka jingthang pathar ïa ki lum bad ki khlaw kam long kaba bha. Don pat kiba ong ba ka jingthang bad wiang ding ka long ban dup mih kloi u phlang lung ban sngaid ki jingri kum ki masi ki blang.
Lada ka long kumne ka la donkam ban ai jinghikai ïa ki paidbah man la ka por, khnang ba kin sngewthuh ban pynneh pynsah ïa ka jingitynnad ka mariang, ki dieng ki siej, ki kynbat ba long dawai bad kiwei kiwei.
