Nongstoiñ, Lber 27: Ka Nonglang Pungsier Anglers Association, ka synjuk kaba ïeng ban ïada ym tang ïa ki doh um doh wah, hynrei ban ïada ruh ïa ki mrad ki mreng, ki sim ki doh, bad ban ïada na ka jingthang pathar ïa ki khlaw ki btap kiba hap hapoh u pud u sam jong ka shnong Nonglang West Khasi hills district bad ki shnong ba mar jan ka la pynpaw ka jingsngewkhia khia namar ka jingjyllei ki nongpynjot dohum doh wah ha kine ki sngi ba mynta.
La ong ba ki don ki rawon na ki shnong ba marjan kum na Umwahlang, Mawsyrpat, Seiñduli, Tynrongmawsaw bad kiwei kiwei kiba long ki dkhot jong katei ka synjuk, ban khanglad ïa ka jingpynïap pathar ïa ki doh um ha ka wah Tyrsung bad ki shnat, ong u Hynrei u bah R.L Nonglait president ka synjuk haba pyntip ha u nongthoh khubor.
Tangba wat la ka synjuk bad ki dkhot ki la ïaleh katba lah ban khanglad ïa ki riew shim kabu ban pynïap pathar ïa ki don um ha ka wah Tyrsung bad ki shnat jong ka, pynban ki riew dusmon ki dang ïoh lad ban pynïap pathar namar ka jingnang rit ka um na ka jingrang ryngkhiang palat, da kaba den na ki jaka kiba khim bad pyntuid ïa ka um sha wei pat ki sa pynrngad bad tong lut ïa ki don um kat ba ki ïoh.
U bah Nonglait u la ong ruh ba ha ka wah Tyrsung ki don ar tylli ki jaka kiba shong bha ki dohkha bad kiwei kiwei, kata ha kawei ka thwei ha ka kshaid Chum chum kaba dei ruh ka thwei kaba bun dohkha tam ha shi lynter jong katei ka wah. Lai tylli ki thwei ha ka jaka ba la khot ka riat thiah shrieh, kiba dei ruh ki thwei kiba bun dohkha bad namar ba ki dei ki jaka kiba lada den ïa ka um lah ban pynkhlad shawei, kumta ki riew shim kabu ki leh da katei ka buit ban ïoh kem lut ïa kid oh um.
U la ong ruh ba ha kshaid Chum chum pat namar ba ha kjat jong ka thwei ka dei ka jaka kaba khim ki riewshim kabu ki khlong lut ïa ki maw kiba rit bad kiba heh ban pynrngad ïa katei ka thwei bad haba peit la isangsot haduh kata katta.
U la ong ruh ba imat kitei ki riew shim kabu ki leh ïa katei ka kam ha ki sngi Blei, namar ba ka dei ka sngi ym don ba ïaid ba ïeng bad wat ki dkhot ka synjuk ruh kim poi pyrkhat ba ki briew kin leh kum ïa kitei ki kam ha ka sngi u Blei. Ha kajuh ka por u la ong ba nangne sha khmat ka synjuk kan pyrshang ban treikam da kiwei pat ki buit kiba thymmai, khnang ba ki riew shim kabu kin ym lait na ka jingshah kem lada ki pyrshang ban pynïap pathar ïa ki don um la ka dei ha kano kano ka por.
U la ong ruh ba la bun bun snem ka synjuk ka don ka jingangnud ba ki bor sorkar kin phai khmat lem sha ka synjuk ban bei pisa na a bynta ban den ïa katei ka wah na kawei ka jaka kaba ka synjuk ka angnud ban pynlong kum ka sanctuary ban pynneh ïa ki dohkha, namar man ka por ki la pyrshang ban trei da ka synjuk, hynrei ym lah satia ban den haduh ba kan da long kum ka thwei.
Lada ka sorkar kan bei pisa ban den na katei ka jaka kan long ruh kum kawei jaka pynlang um kaba heh bha ka ban long ka jingmyntoi na ka bynta ki paitbah jong ka thaiñ.
