Shillong, Naiwiieng 27: Ka seng Hynniewtrep Achik National Movement (HANM) kala khot ia ka jingïalang jong ka Executive Committee ha ka 2 tarik u bnai ban wan ha ophis trei kam ka seng haka por 1:30 janmiet ban ïakren halor ka shithi kaba la wan na ka sorkar pdeng lyngba ka tnad kam poh iing halor ki dorkhas bad ka jingïakhih ba ka seng kala pynlong ha ka 3 tarik mynta u bnai ha nongbah Delhi.
Ka Seng ka la pyntip ba ka Seng ka la ïoh pdiang artylli ki shithi na ka sorkar pdeng hadien ba ka la pynlong ïa ka jingïakhih ha Delhi, ha kaba ïadei bad ka jingdawa ban ithuh noh ïa ka Ktien Khasi ha ka Khyrnit kaba phra jong ka riti synshar ka ri India. Nangta ka jingdawa ban pyntreikam noh ïa ka Inner Line Permit bad ka jingpynbeit noh ïa u pud u sam hapdeng ka Meghalaya bad ka Assam.
U Bah Venus Rangsliang nongaiktien ka Seng Kmie, u la pyntip ba ha kane ka jingïalang yn ïakren ruh ban pynthymmai ïa ki Commitee bapher bapher kiba don hapoh ka seng, kum ka Committe ba peit ïa ka khyndew ka shyiap, ka Committee ba dei peit ïa ka kam pisa, ka Committee ba dei peit ïa ki lad ïoh kam ïoh jam bad ka Committee ba peit ïa ka jingpynïaid beit hapoh ka seng.
Ha kane ka jingïalang jong ka Executive Committee yn ïakren ruh kumno ban pynkhlaiñ ïa ka jingtreikam jong ka Central Executive Committee bad kiwei kiwei ki kam lada don hapoh ka Seng lada don ban ïakren ha katei ka sngi na ka bynta ban pynkhlaiñ ïa ka jingtrei kam ka Seng.
Ka phang pdeng jong ka jingïakren ha kane ka jingalang kan long halor ki ar tylli ki shithi kiba la wan na ka sorkar pdeng ha dien ba ka seng kala leit ban ai ia ki dorkhas bad ka jingiakhih kaba la pynlong ha Jantar Mantar New Delhi, kane ka long katkum ka kyrwoh kaba la phah da u bah Venus Rangsliang nongai ktien ka seng HANM seng kmie, Shillong Meghalaya.
