Nongstoiñ, Nailar, 27: Ka HYC Permadan Unit ryngkat ka HYC Mawthadraishan Circle, ha ka sngi thohdieng hapoh ka jingïalam jong u President ka HYC Permadan Unit samla Kyrshanbor Mawlieh bad u samla Markos Marthong President HYC Mawthadraishan Circle, ki la hiar jurip ïa ka surok shnong hapoh ka shnong Permadan, kaba la sniew palat khamtam ha kine ki bnai lyiur kaba la pynjynjar ïa ki paidbah nongïaid nongieng khamtam ïa ki khynnah skul kiba ïaid na kane ka surok.
Halor kane ka jingeh jong ki paidbah, ka HYC Permadan Unit ryngkat ka HYC Mawthadraishan Circle ki la lap hi da la de ïa ka jingsniew jong kane ka surok. Ka HYC ka kyntu ïa ka Sorkar lyngba ka tnad PWD ba kan peit lem halor kane ka jingeh.
Ka HYC Permanent Unit ka dawa na ka tnad PWD ban shna surok na ka Shnong Permadan sha ka Shnong Kynshi Mawria, namar ka kham jan ban ïa kaba na Permadan kan leit sha lad Surok Myrïaw sha Kynshi kaba la jngai bad kyllaiñ palat. Ka HYC Permadan Unit shen kan sa leit ai da ka jingthoh sha ka tnad PWD na ka bynta kane ka jingeh.
