Jop ka South Garo Hills District Cricket Association bad ka Shillong Cricket Association

Shillong, Nailur 07: Ka jingïalehkai jong ka U-19 Girls Inter District Cricket Tournament, ba la pynïaid da ka Meghalaya Cricket Association, kaba la long hynne ka Sngi Palei ha ar tylli ki madan ïalehkai, ka la jam sha kaba kut ha kaba ka South Garo Hills District Cricket Association bad ka Shillong Cricket Association ki la khur ïa ka namjop.
Ka jinglah jong ka Marme M Sangma ban kamai bun ron bad ruh ban lehbha ha ka kawangbol ka la ïarap ïa ka South Garo Hills District Cricket Association ban pynthikna ïa ka namjop ha ka jingïakhun pyrshah ïa ka Tura DCA da 57 ron ha ka sngi ba ar jong ka Meghalaya Cricket Association’s U-19 Girls Inter District Cricket Tournament ha Salpara kaba ha North Garo Hills hynne ka Sngi Palei.
Haba kawei pat ka jingïakhun, kaba long ha Umbuda, Ri-Bhoi, ka Shillong Cricket Association ka la pynliem ïa ka West Khasi Hills DCA da 15 ron.
Baroh ar tylli ki jingïakhun la shah pynthut ha u slap hadien ka inning ba nyngkong, bad ha ka madan lehkai kaba ar lane ka Zone 2, ka SGH ka la sdang ban tied nyngkong, bad na ka liang jong ki player kane ka kynhun ki la ïoh ban kamai 143 ron bad shah pynhap da 7 wicket haduh kaba kut jong ka 35 over.
Ka Marme ka la ïoh ban kamai bun ron duh na ka bynta ka kynhun khlem shah pynhap da 33 ron, ki la don ruh katto katne ngut kiba la ïoh ban kyntiew ïa ka ron kiba kynthup ïa ka Janicka R Marak 27 ron bad ka Jaylynn R Marak da 22 ron.
Katba ka Awesa G Momin ka la ïoh ban khur bun wicket da 3 bad ailad tang 31 ron na ki bol kiba ka kawang.
Hadien ka jingshah pynthut ha u slap, ka Tura ka la ïoh ban bteng ïa ka jingïalehkai bad donkam ban beh ïa ka 118 ron na ki 25 over hynrei phewse baroh ki player kane ka kynhun ki la shah pynhap noh tang hadien ba kynjoh sha ka 60 ron.
Ka namtam ka la leit sha ka Marme, kaba la khur 3 wicket bad tang 7 ron. Katba ka Rikmanchi M Sangma bad ka Brespina N Marak ki la ïoh ban pynhap mar ar wicket, hynrei ym shym la don kawei ruh ka player jong ka Tura ban ïoh kamai bun ron.
Sa ha kawei pat ka jingïakhun ha ka wei de ka madan, ( Zone 1), ka SCA ka la jop ïa ka toss bad ka la jied ban tied nyngkong bad shah pynhap baroh ki wicket tang hadien ba kynjoh sha ka 143 ron na ki 34.3 over. Ka Natasha Rabha ka la ïoh ban kamai 22 ron, katba ka Neelam Roy bad ka Anjana Sahani ki la ïoh ban kamai mar 20 ron.
Na ka bynta ka WKH, ka Fenny Nongrum ka la khylliap ïa ka inning da 4 wicket bad 8 ron na ki 7 over, katba ka Sistilin Ryntathiang bad ka Abiezer Kharsyiem ki la ïoh ban pynhap mar 2 wicket.
Ha kane ka jingïalehkai ruh la shah pynthut ha u slap ba jur, kaba la pynlong ïa ki nongpynïaid ban pynlyngkot sha ka 10 over na ka bynta ka WKH ban beh ïa ka thong kaba 61 ron. Hynrei ki la ïoh ban kynjoh tang sha ka 45 ron hap da 4 wicket haduh kaba kut ka 10 over, bad ka Roy, Rabha bad ka Chandni K Sahani ki la ïoh ban khur mar shi wicket na ka bynta ka SCA.
Mynta ka sngi, ka East Khasi Hills CA pyrshah ïa ka South West Khasi Hills DCA ha ka Zone 1 katba ka Tura kan sa ïakhun bad ka North Garo Hills DCA ha ka Zone 2.